2 мая Папа Францішак скіраваў ліст да святароў, якія бралі ўдзел у сустрэчы «Пробашчы на карысць Сінода», што праходзіла ў Сакрафана пад Рымам з 29 красавіка.
Як паведаміла Беларуская рэдакцыя парталу Vatican News, Пантыфік выказаў падзяку і пашану святарам, якія служаць у касцёлах на перыферыях, у вялікіх парафіях, у тых, дзе становіцца ўсё больш пажылых людзей, а таксама ў каталіцкіх супольнасцях, «якія ўзнікаюць пад вялікім дрэвам, дзе спеў птушак злучаецца са спевамі дзяцей».
«Сінадальны Касцёл» мае патрэбу ў сваіх пробашчах, — запэўніў Пантыфік у звароце, абнародаваным у чацвер у Ватыкане.
«Мы ніколі не станем місійным сінадальным Касцёлам, калі парафіяльныя супольнасці не зробяць адметнай рысай свайго жыцця ўдзел усіх ахрышчаных у агульнай місіі абвяшчэння Евангелля. Калі парафіі не будуць сінадальнымі і місійнымі, такім не будзе і Касцёл», — заўважыў Святы Айцец.
Ён параіў пробашчам заўважаць насенне, якое Святы Дух сее ў Божым народзе. На яго думку, тэрмінова неабходна «адкрыць, падтрымаць і ацаніць» розныя харызмы, якія даюцца свецкім вернікам. Такім чынам святары дапамогуць выйсці на паверхню «шматлікім схаваным скарбам» і будуць адчуваць сябе «менш самотнымі ў вялікім заданні евангелізацыі, спазнаўшы радасць сапраўднага бацькоўства, якое не прыгнятае, але дазваляе праявіцца ў іншых, у мужчынах і жанчынах, вялікаму каштоўнаму патэнцыялу», — зазначыў Папа.
Пантыфік заахвоціў практыкаваць «размовы ў Духу» і духоўнае распазнаванне, важныя для штодзённага касцёльнага жыцця, бо гэта дапамагае распазнаваць харызмы, з мудрасцю давяраць заданні і паслугі, планаваць душпастырскія шляхі ў святле Духа.
Пастыр паўсюднага Касцёла нагадаў пробашчам пра каштоўнасць адносін з іншымі святарамі і біскупамі.
«Мы не можам стаць сапраўднымі бацькамі, калі ў першую чаргу не будзем сынамі і братамі. У нас не атрымаецца ствараць адзінства і ўдзел у жыцці супольнасцяў, давераных нам, калі спачатку мы не будзем жыць гэтым паміж сабой», — дадаў Папа.
Нагадаўшы пра другую сесію XVI Звычайнай агульнай асамблеі Сіноду Біскупаў, якая пройдзе ў кастрычніка 2024 года ў Ватыкане, Святы Айцец заклікаў святароў станавіцца «місіянерамі сінадальнасці» таксама ў іх штодзённым служэнні.
Сустрэча «Пробашчы на карысць Сінода праходзіла з 29 красавіка да 2 мая пад эгідай Святога Пасаду. У форуме бралі ўдзел дэлегаты з 90-а краін свету. Беларусь прадстаўляў ксёндз канонік Аляксей Ляшко, душпастыр парафіі ў Лёзна (Віцебская дыяцэзія).
