Нунцый Ёзіч падчас сустрэчы з Папам Францішкам у верасні 2022 года. Архіўнае фота: Vatican Media
8 верасня адбылася сустрэча Святога Айца Францішка з арцыбіскупам Антэ Ёзічам, Апостальскім нунцыем у Беларусі.
Пра гэта са спасылкай на прэс-службу Святога Пасаду паведаміла Беларуская рэдакцыя парталу Vatican News.
Аб змесце размовы падчас аўдыенцыі, якая прайшла раніцай у ватыканскім Апостальскім палацы, не паведамляецца.
Арцыбіскуп Антэ Ёзіч з’яўляецца прадстаўніком Папы Францішка ў Беларусі з 21 мая 2020 года. Ён стаў другім харвацкім іерархам на пасадзе Апостальскага нунцыя ў Беларусі. З 15 верасня 2004 года па 15 ліпеня 2011 года дыпламатычнае прадстаўніцтва Святога Пасада ў краіне ўзначальваў арцыбіскуп Марцін Відавіч, які, як і цяперашні нунцый, належыць да духавенства Спліцка-Макарскай архідыяцэзіі.
