15 мая Папа Францішак праводзіць нараду з кіраўнікамі ведамстваў Рымскай курыі. У пасяджэнні бяруць удзел прэфекты дыкастэрый і іншых структур Святога Пасаду.
Як паведаміла Беларуская служба парталу Vatican News, нарада праходзіць у Балонскай зале Апостальскага палаца за зачыненымі дзвярыма. Прэс-служба Святога Пасаду не інфармуе пра тэмы, якія Святы Айцец абмяркоўвае са сваімі бліжэйшымі супрацоўнікамі.
Звычайна падчас такіх сустрэч адбываецца абмеркаванне актуальных праблем Касцёла і вызначэнне асноўных задач, якія знаходзяцца ў кампетэнцыі ведамстваў Апостальскай Сталіцы.
Як правіла, па выніках не публікуецца ніякіх заяваў.
Vatican News нагадвае, што ў сакавіку мінулага года Папа Францішак падпісаў тэкст новай Апостальскай канстытуцыі аб Рымскай курыі і яе служэнні Касцёлу і свету. Назва дакумента — Prædicate Evangelium («Абвяшчайце Евангелле») — указвае на місіянерскі характар рэформы.
Усе былыя кангрэгацыі і папскія рады былі перайменаваны ў дыкастэрыі — цяпер іх шаснаццаць.
Органы правасуддзя па-ранейшаму прадстаўлены Апостальскай пэнітэнцыярыяй, Найвышэйшым трыбуналам Апостальскай сігнатуры і Трыбуналам Рымскай роты.
Эканамічны блок складаецца з Рады па эканамічных пытаннях, Сакратарыята па эканамічных пытаннях, Адміністрацыі маёмасці Апостальскай Сталіцы, Упраўлення генеральнага аўдытара, Камісіі па справах сакрэтнага характару і Камітэта па інвестыцыях.
Дзяржаўны Сакратарыят у дакуменце акрэсліваецца як Папскі сакратарыят.
Пантыфік рэгулярна, некалькі разоў на год, збірае кіраўніцтва вышэйзгаданых структур на сумесныя пасяджэнні.
