28 красавіка каля 8-й гадзіны раніцы па цэнтральнаеўрапейскім часе самалёт з Папам Францішкам на борце вылецеў з рымскага аэрапорту Ф’юмічына і ўзяў курс на сталіцу Венгрыі Будапешт.
Святы Айцец распачаў сваё 41-е замежнае Апостальскае падарожжа, якое за два дні да гэтага даручыў апецы Маці Божай падчас традыцыйнай малітвы ў рымскай базыліцы Святой Марыі Вялікай. Дэвіз пілігрымкі: «Хрыстус — наша будучыня»
З 28 па 30 красавіка Папа Францішак будзе знаходзіцца ў Венгрыі, дзе правядзе шэраг сустрэч. Уся праграма яго Апостальскага візіту пройдзе ў сталіцы краіне Будапешце.
Пасля двухгадзіннага пералёту распачнецца афіцыйная цырымонія прывітання перад сталічным Палацам Шандара, рэзідэнцыяй кіраўніка дзяржавы, а потым Папа сустрэнецца там з прэзідэнтам і прэм’ер-міністрам Венрыі, якая з’яўляецца парламенцкай рэспублікай.
Апоўдні Пантыфік скіруецца ў былы кармэліцкі кляштар у Будапешце, дзе звернецца з прамовай да прадстаўнікоў уладаў, грамадзянскай супольнасці і дыпламатычнага корпусу. Увечары адбудзецца сустрэча Папы з мясцовымі біскупамі, святарамі, дыяканамі, кансэкраванымі асобамі, семінарыстамі і душпастырскімі работнікамі, якая пройдзе ў сталічным конкатэдральным касцёле святога Стэфана.
У суботу раніцай Святы Айцец наведае з прыватным візітам дзяцей, якія атрымліваюць дапамогу ў цэнтры імя благаслаўлёнага Ласла Бацьяні-Штратмана, пасля чаго ў касцёле святой Альжбеты Венгерскай сустрэнецца з беднымі і бежанцамі. Апоўдні ён наведае грэка-каталіцкую супольнасць у царкве Апекі Маці Божай, а ў другой палове дня ў спартовым комплексе пройдзе сустрэча Пантыфіка з венгерскай моладдзю. Увечары Папа, які належыць да Таварыства Езуса, традыцыйна правядзе ў нунцыятуры прыватную сустрэчу з мясцовымі езуітамі.
30 красавіка, у нядзелю Добрага пастыра, Папа Францішак у 9.30 па мясцовым часе ўзначаліць цэлебрацыю святой Імшы на плошчы Лаяша Кошута і прамовіць гамілію, а пасля Эўхарыстыі правядзе малітву «Уладарка неба», якая ў Велікодны перыяд прамаўляецца замест «Анёл Панскі».
Апошнім пунктам праграмы Апостальскага падарожжа Папы Францішка ў Венрыю стане яго сустрэча ў другой палове дня з прадстаўнікамі ўніверсітэцкага свету і дзеячамі культуры на факультэце інфарматыкі і біёнікі Каталіцкага ўніверсітэта імя Пэтэра Пазманя. Адтуль Святы Айцец скіруецца ў аэрапорт, адкуль, пасля цырымоніі развітання, вылеціць у Рым.
Сачыць за Апостальскім падарожжам Папы Францішка ў Венгрыю можна анлайн на YouTube канале Vatican Media.
