13 красавіка была агучана тэма ІІІ Сусветнага дня бабуль, дзядуль і пажылых людзей, які будзе адзначацца ў Касцёле ў нядзелю 23 ліпеня.
Як паведаміла Беларуская рэдакцыя парталу Vatican News, у якасці тэмы былі абраныя словы з Евангелля паводле Лукі:
Міласэрнасць Яго з пакалення ў пакаленне. (Лк 1, 50)
Яны сугучныя з тэмай Сусветных дзён моладзі, якія гэтым жа летам пройдуць у Лісабоне (1–6 жніўня): «Сабраўшыся, Марыя ў тыя дні паспяшыла ў горную краіну» (Лк 1, 39). Яна адправілася наведаць састарэлую Альжбету і абвясціла ў Magnificat сілу запавету паміж маладымі і пажылымі.
У спецыяльным паведамленні Святога Пасаду гаворыцца, што Папа Францішак плануе ў сёлетні Дзень пажылых людзей узначаліць эўхарыстычную літургію ў базіліцы святога Пятра. Святы Айцец запрашае парафіі, дыяцэзіі, рухі і касцёльныя супольнасці ва ўсім свеце адзначыць гэты дзень у адпаведным душпастырскім кантэксце.
