Папа Францішак узначаліць пакаяннае набажэнства, якое ў межах ініцыятывы «24 гадзіны для Пана» адбудзецца ў рымскім касцёле Санта-Марыя-дэлле-Грацые-аль-Трыумфале.
Як паведаміла Беларуская рэдакцыя парталу Vatican News, велікапосная акцыя сёлета пройдзе пад дэвізам «Будзь міласцівы да мяне, грэшнага» (Лк 18, 13).
Яна мае агульнакасцёльны характар і будзе праходзіць ва ўсіх дыяцэзіях свету напярэдадні IV Нядзелі Вялікага посту, з пятніцы 17 сакавіка па суботу 18 сакавіка.
У межах гэтай душпастырскай ініцыятывы многія касцёлы не будуць закрывацца на ноч, даючы вернікам выключную магчымасць належна падрыхтавацца да ўрачыстасці Уваскрасення Пана, прыступіўшы да сакрамэнту споведзі ў кантэксце Эўхарыстычнай адарацыі.
Дыкастэрыя па евангелізацыі паведаміла, што набажэнства з удзелам Святога Айца распачнецца ў 16.30. Колькасць білетаў для ахвотных узяць у ім удзел абмежавана ўмяшчальнасцю парафіяльнага касцёла. Іх можна замовіць на сайце ватыканскага ведамства. Там жа можна спампаваць дапаможныя матэрыялы для правядзення ініцыятывы «24 гадзіны для Пана» ў дыяцэзіях.
