Папа Францішак даручыў стварыць на базе былой летняй папскай рэзідэнцыі ў Кастэль Гандольфа цэнтр экалагічнай адукацыі і сельскай гаспадаркі.
Пра гэта са спасылкай на прэс-рэліз Губернатарату Дзяржавы Ватыкан, апублікаваны 2 лютага, паведаміла Беларуская рэдакцыя парталу Vatican News. На сайце адміністрацыйнага ватыканскага ведамства былі апублікаваныя два папскія дакументы, якімі Пантыфік стварае навучальны цэнтр і запускае праект пад назвай Мястэчка Laudato si’ (іт.: Borgo Laudato si’), вызначаючы адказных за яго ажыццяўленне.
Мерапрыемствы, якія будуць рэалізаваныя ў бліжэйшыя месяцы, скіраваныя на спалучэнне адукацыі ў галіне інтэгральнай экалогіі, цыркулярнай і генератыўнай эканомікі і экалагічнай устойлівасці.
Мэта ініцыятывы — прапанаваць канкрэтнае прымяненне прынцыпаў, прадстаўленых у так званай «экалагічнай» энцыкліцы Папы Францішка Laudato si’, прысвечанай клопату пра супольны дом.
Ватыканскія ўлады абвясцілі, што рэканструкцыя садоў і будынкаў ля возера Альбана будзе праходзіць у бліжэйшыя месяцы.
Комплекс Кастэль Гандольфа плошчай 55 гектараў з пачатку XVII стагоддзя выкарыстоўваецца як летняя рэзідэнцыя Пантыфікаў. Акрамя двух палацава-паркавых зон, у яго ўваходзяць сельскагаспадарчыя надзелы і гаспадарчыя пабудовы.
Папярэднік цяперашняга Пантыфіка Бэнэдыкт XVI праводзіў у Кастэль Гандольфа пэўны час у летні перыяд. Папа Францішак ніколі ўжо тут не адпачываў і ў 2016 годзе даручыў ператварыць комплекс у музей.
