У сераду 28 снежня, завяршаючы агульную аўдыенцыю, Папа Францішак звярнуўся з заклікам аб асаблівай малітоўнай падтрымцы цяжка хворага Бэнэдыкта XVI.
Словы Святога Айца перадае Беларуская рэдакцыя парталу Vatican News.
«Хацеў бы прасіць вас усіх асаблівым чынам маліцца за Папу эмэрыта Бэнэдыкта, які ціха падтрымлівае Касцёл. Памятайце пра яго, ён вельмі хворы. Просім Пана, каб суцешыў яго і падтрымаў у гэтым сведчанні любові да Касцёла да канца», — звярнуўся Пантыфік да прысутных на агульнай аўдыенцыі ў Зале Паўла VI.
28 снежня Папа Францішак наведаў у Ватыкане цяжка хворага Бэнэдыкта XVI. Здароўе 95-гадовага Папы эмэрыта ў апошнія гадзіны пагоршылася «з прычыны сталага ўзросту, — сказаў кіраўнік прэс-службы Святога Пасаду Матэо Бруні. — Сітуацыя на дадзены момант застаецца пад кантролем, ён знаходзіцца пад пастаянным наглядам медыкаў».
