25 лістапада Папа Францішак здзейсніў прызначэнні ў розных структурах Рымскай курыі і звязаных з ёй установах. Дзве высокія кіраўнічыя пасады занялі жанчыны.
Як паведаміла Беларуская рэдакцыя парталу Vatican News, Святы Айцец прызначыў старшыню і сакратара Папскай камісіі па сакральнай археалогіі. Імі сталі адпаведна монсеньёр Паскуале Якабонэ, дагэтуль — сакратар і член Камісіі, і Рафаэла Джуліяні, дагэтуль — супрацоўніца гэтай структуры, аўтар шматлікіх публікацый, прысвечаных хрысціянскім катакомбам.
Папа прызначыў таксама падсакратаром Дыкастэрыі па справах культуры і адукацыі прафесара Антанэлу Шаронэ Алібрандзі, прарэктара Каталіцкага ўніверсітэта Найсвяцейшага Сэрца ў Мілане, спецыяліста ў сферы эканомікі, права, фінансавай і банкаўскай дзейнасці. Яна з’яўляецца, між іншым, старшынёй Асацыяцыі выкладчыкаў права ў эканамічнай сферы.
Прызначэнне атрымаў таксама прафесар Лука Туніцэці, дэкан факультэта філасофіі Папскага Урбаніянскага ўніверсітэта ў Рыме. Ён стаў сакратаром Папскай акадэміі святога Тамаша Аквінскага.
