22 чэрвеня ў Рыме распачыянаецца Дзясятая Сусветная сустрэча сем’яў, якая праходзіць на тэму: «Любоў у сям’і: пакліканне і шлях да святасці».
У сустрэчы бярэ ўдзел таксама дэлегацыя з Беларусі, у склад якой уваходзяць айцец Пётр Фраштэнга OCD, сакратар Рады па справах сям’і пры ККББ, а таксама сужэнцы Ян і Ліля Кобзікі.
Узначальвае беларускую дэлегацыю біскуп Аляксандр Яшэўскі SDB.
Як паведамляе Беларуская рэдакцыя парталу Vatican News, сёлета Папа Францішак змяніў звычайную формулу правядзення форума, і цяпер ён мае «шматцэнтравы і ўніверсальны» характар. Галоўным месцам сустрэчы з’яўляецца Рым, але ў тыя ж дні кожная дыяцэзія можа арганізаваць свае мерапрыемствы з удзелам сем.яў і супольнасцяў.
Дзясятая Сусветная сустрэча сем’яў распачнецца ў сераду ўвечары Фестывалем сем’яў, які пройдзе з прысутнасцю Святога Айца ў ватыканскай Зале Паўла VI. Там жа будуць адбывацца ўсе канферэнцыі і дыскусійныя панэлі.
23 чэрвеня тэмай дня стане любоў у сям’і. Удзельнікі паразмаўляюць, між іншым, на тэмы: «Сужэнцы і святары разам у будаўніцтве Касцёла», «Моладзь і пажылыя разам для Касцёла заўтрашняга дня», «Суправаджэнне ў першыя гады пасля шлюбу». Завершыцца дзень канцэртам і наведваннем Латэранскага палаца.
Тэмай пятніцы стане пакліканне. Дэлегаты, між іншым, возьмуць удзел у дзвюх дыскусіях: «Быць хрысціянінам у лічбавую эпоху» і «Пакліканне і місія на экзістэнцыяльнай перыферыі».
Праграма суботы будзе прысвечана «шляхам святасці». Дзень распачнецца з эўхарыстычнай адарацыі. Увечары на плошчы Святога Пятра Папа Францішак узначаліць цэлебрацыю Імшы для ўдзельнікаў сустрэчы.
У нядзелю 26 чэрвеня яны зноў збяруцца на ватыканскай плошчы, каб узяць удзел у малітве Анёл Панскі і пачуць пасланне Папы да сем’яў.
Сусветныя сустрэчы сем’яў ініцыяваў святы Ян Павел II. Першая прайшла ў Рыме ў 1994 годзе пад дэвізам: «Сям’я ў цэнтры цывілізацыі любові».
Яны звычайна арганізоўваюцца раз у тры гады. Дзясятая Сусветная сустрэча сем’яў завяршае Год сям’і Amoris Lætitia, які распачаўся 19 сакавіка 2021 года. Сямейныя форумы скіраваны на дыялог, дэманстрацыю ролі сям’і ў евангелізацыі і ўмацаванне тоеснасці сям’і.
