Пошук

03.05.2022 11:28   Паводле: Vatican News
Ілюстрацыйная выява: farodiroma.it

Падчас сустрэчы з вернікамі на малітве Regina cæli, якая 1 мая прайшла на плошчы святога Пятра ў Ватыкане, Папа Францішак у чарговы раз звярнуў увагу на трагічную сітуацыю насельніцтва Украіны ва ўмовах вайны.

«Сёння пачынаецца месяц, прысвечаны Маці Божай.

Я б хацеў заахвоціць усіх вернікаў і ўсе супольнасці штодзённа маліцца Ружанец у інтэнцыі міру.

Мае думкі адразу скіроўваюцца да ўкраінскага горада Марыупаль — „горада Марыі” — па-варварску разбомбленага і разбуранага. Тут і цяпер я зноў прашу стварыць бяспечныя гуманітарныя калідоры для людзей, якія апынуліся ў пастцы на сталеліцейным заводзе гэтага горада. Пакутую і плачу, думаючы пра цярпенні ўкраінскага народа, асабліва самых слабых, пажылых і непаўналетніх. Прыходзяць нават жахлівыя паведамленні пра выгнаных і дэпартаваных дзяцей», — сказаў Папа, чые словы перадала Беларуская рэдакцыя парталу Vatican News.

«І ў той час як мы з’яўляемся сведкамі жудаснага заняпаду чалавецтва, я пытаюся, разам з мноствам людзей, ахопленых трывогай: ці сапраўды адбываецца пошук міру; ці ёсць жаданне пазбегнуць далейшай ваеннай і слоўнай эскалацыі; ці робіцца ўсё магчымае для таго, каб змоўкла зброя? Прашу вас не скарацца перад логікай насілля, вычварнай спіраллю ўзбраенняў.

Ступім на шлях дыялогу і міру! Памолімся за гэта», — запрасіў Папа Францішак, пасля чаго на ватыканскай плошчы запанавала малітоўная цішыня.

Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа