13 сакавіка Старшыня Канферэнцыі Каталіцкіх Біскупаў у Беларусі біскуп Віцебскі Алег Буткевіч ад імя епіскапату і вернікаў Беларусі скіраваў Папу Францішку віншаванне з нагоды дзявятай гадавіны яго абрання біскупам Рыма.
«Прыміце нашы найлепшыя пажаданні, у якіх мы давяраем Богу ўсё, што Ваша Святасць носіць у сваім сэрцы!
Хочам выказаць Вам глыбокую ўдзячнасць за нястомную прысутнасць Вашай Святасці на стырне Пятровага чаўна, які пакутуе ад шматлікіх небяспек і выпрабаванняў у гэты драматычны час», — напісаў кіраўнік беларускага каталіцкага епіскапату.
Ён выказаў асаблівую падзяку Святому Айцу за тое, што ён заўсёды ставіць чалавечую годнасць у цэнтры ўвагі, абапіраючы яе на Божым вобразе, утоеным у чалавеку, адзначыўшы, што гэты вобраз часта патрабуе ачышчэння.
«Дапамогай у гэтым ёсць таксама сведчанне Вашай Святасці і словы, звернутыя да нас кожны дзень, — моцныя і ў той жа час поўныя пяшчотнай любові, глыбока чалавечныя і адначасова Божыя. Гэта асабліва важна сёння, калі між краінамі няма міру і нават вядуцца войны.
Таму Вашыя словы і сведчанне, якія нясуць веру і надзею, агульначалавечыя і духоўныя каштоўнасці — гэта сапраўды вялікі дар для ўсіх нас», — адзначыў біскуп Буткевіч.
На заканчэнне Старшыня ККББ запэўніў Папу Францішка: «Беларусь любіць Вас, моліцца за Вас, чакае Вас і просіць Вашага бласлаўлення!»
