8 сакавіка адбылася тэлефонная размова паміж Дзяржаўным Сакратаром Яго Святасці Папы Францішка кардыналам П’етро Паралінам і міністрам замежных спраў Расіі Сяргеем Лаўровым.
Як са спасылкай на прэс-сакратара Святога Пасаду Матэо Бруні паведаміла Украінская рэдакцыя парталу Vatican News, у размове кардынал Паралін паўтарыў Лаўрову тое, да чаго неаднаразова заклікаў Папа Францішак, а менавіта неадкладна спыніць баявыя дзеянні.
Кардынал Дзяржсакратар запэўніў кіраўніка знешнепалітычнага ведамства Расіі ў гатоўнасці Святога Пасаду да любой формы пасрэдніцтва, якая можа быць карыснай для спрыяння міру.
Кіраўнік прэс-службы Святога Пасаду Матэо Бруні ў адказ на пытанні журналістаў сказаў:
«Я пацвярджаю факт тэлефоннай размовы паміж кардыналам Дзяржсакратаром і расійскім міністрам замежных спраў. Кардынал перадаў глыбокую занепакоенасць Папы Францішка вайною, што працягваецца ва Украіне, і паўтарыў тое, пра што Папа казаў у мінулую нядзелю падчас малітвы „Анёл Панскі“.
Акрамя таго, ён паўтарыў заклік спыніць узброенае наступленне, гарантаваць гуманітарныя калідоры для грамадзянскага насельніцтва і тых, хто аказвае дапамогу, і каб насілле зброі саступіла месца перамовам. У гэтым сэнсе Дзяржаўны Сакратар яшчэ раз пацвердзіў гатоўнасць Святога Пасаду зрабіць усё магчымае для таго, каб паслужыць дасягненню гэтага міру», — сказаў Матэо Бруні.
