![](/3/images/news/2022/02/2022-02-16-bisbes_papa.jpg)
15 лютага ў Ватыкане быў абнародаваны дакумент Папы Францішка motu proprio пад назвай Assegnare alcune competenze («Надаць некаторыя кампетэнцыі»), якім прадугледжваецца большая дэцэнтралізацыя ў пытаннях, звязаных з кіраваннем семінарыямі, фармацыяй святароў, рэдагаваннем і выданнем катэхізісаў і іншымі сферамі.
Як паведаміла Беларуская рэдакцыя парталу Vatican News, такім чынам Святы Айцец пашырыў кампетэнцыі біскупаў і вышэйшых настаяцеляў манаскіх супольнасцяў, змяніўшы некаторыя нормы Кодэкса Кананічнага Права Касцёла і Кодэкса Канонаў Усходніх Касцёлаў.
У адпаведнасці з новымі нормамі, цяпер біскупам не трэба будзе скіроўваць просьбу аб ухваленні Святым Пасадам па гэтых пытаннях: дастаткова будзе простага пацвярджэння.
На думку Папы, новаўвядзенні павінны спрыяць «здаровай дэцэнтралізацыі, пачуццю калегіяльнасці і пастырскай адказнасці біскупаў», а таксама зробяць «прыняцце рашэнняў у касцёльнай сферы больш дынамічным».
Дэцэнтралізацыя закране пытанні, звязаныя з заснаваннем міждыяцэзіяльных семінарый і зацвярджэннем іх статутаў, зацвярджэннем праграм святарскай фармацыі, інкардынацыяй святароў у касцёльныя структуры, заснаваннем і зацвярджэннем асацыяцый, зацвярджэннем катэхізісаў, выдадзеных епіскапатамі, скарачэннем колькасці цэлебрацыі святых Імшаў адносна атрыманых інтэнцый, выключэннем з манаскіх супольнасцяў законнікаў, якія не прынеслі вечных манаскіх абяцанняў. Motu proprio таксама павялічвае з трох да пяці гадоў тэрмін, на працягу якога законнік па сур’ёзных прычынах можа пражываць па-за сваёй супольнасцю.