На заканчэнне агульнай аўдыенцыі, якая 26 студзеня прайшла ў Ватыкане, Папа Францішак правёў малітву за мір ва Украіне. Ён заклікаў вернікаў маліцца ў гэтай інтэнцыі таксама на працягу дня.
«Будзем горача прасіць Пана, каб гэта зямля магла ўбачыць росквіт братэрства і пераадолець раны, страх і падзелы», — сказаў Святы Айцец, словы якога прыводзіць Беларуская рэдакцыя парталу Vatican News. Пры гэтым Папа нагадаў, што падчас Другой сусветнай вайны загінула каля 5-і млн украінцаў.
«Гэты народ шматпакутны: ён выцерпеў голад, спазнаў нямала жорсткасці і заслугоўвае міру.
Няхай жа малітвы і ўскліканні, якія сёння ўзносяцца да неба, дакрануцца да розуму і сэрцаў адказных на зямлі, каб яны паставілі дыялог і дабро ўсіх вышэй за прыватныя інтарэсы. Прашу: няхай больш ніколі не будзе вайны!» — сказаў Пантыфік, заклікаючы вернікаў памаліцца Ойча наш: «малітву, якая робіць нас братамі, малітву братоў, якія просяць аб прымірэнні і згодзе».
Святы Айцец абвясціў 26 студзеня спецыяльным Днём малітвы за мір ва Украіне пасля малітвы «Анёл Панскі» ў мінулую нядзелю, 23 студзеня.
Увечары 26 студзеня прадстаўнік Папы Францішак ў нашай краіне Апостальскі нунцый Антэ Ёзіч ў адказ на заклік Папы ўзначаліць цэлебрацыю святой Імшы ў інтэнцыі міру ў мінскім катэдральным касцёле Найсвяцейшага Імя Марыі.
Пачатак у 18.30.
