26 студзеня ў мінскім катэдральным касцёле Найсвяцейшага Імя Марыі адбудзецца святая Імша ў інтэнцыі міру, цэлебрацыю якой узначаліць Апостальскі нунцый у Беларусі арцыбіскуп Антэ Ёзіч.
Малітва за мір у галоўнай святыні Мінска-Магілёўскай архідыяцэзіі з прамой трансляцыяй на Catholic.by адбудзецца ў адказ на ініцыятыву Папы Францішка, які пасля нядзельнай малітвы Анёл Панскі выказаў занепакоенасць сітуацыяй вакол Украіны і абвясціў спецыяльны Дзень малітвы за мір.
«З трывогай назіраю за ўзрастаннем напружанасці, якая пагражае нанесці новы ўдар па міры ва Украіне і ставіць пад пытанне бяспеку на ўсім еўрапейскім кантыненце з яшчэ больш шырокімі наступствамі. <…>
Таму з занепакоенасцю з прычыны існуючай напружанасці прапаную, каб наступная серада, 26 студзеня, стала Днём малітвы за мір», — сказаў Святы Айцец.
Яго прадстаўнік у нашай краіне следам за Пантыфікам заахвочвае вернікаў Касцёла ў Беларусі і ўсіх людзей добрай волі «ўзносіць малітвы да Усемагутнага Бога, каб кожная палітычная ініцыятыва служыла агульначалавечаму братэрству больш, чым аднабаковай выгадзе».
Святая Імша з удзелам Апостальскага нунцыя распачнецца ў мінскай архікатэдры 26 студзеня ў 18.30.
