Праўда робіць свабоднымі, радаснымі і шчаслівымі, — падкрэсліў Папа Францішак падчас агульнай аўдыенцыі, якая 6 кастрычніка прайшла ў ватыканскай Зале Паўла VI.
Як паведамляе Беларуская рэдакцыя парталу Vatican News, працягваючы катэхетычны цыкл, прысвечаны Пасланню да Галатаў, Пантыфік заўважыў, што ў ім святы Павел напісаў «неўміручыя словы аб хрысціянскай свабодзе». Апостал не мог цярпліва адносіцца да таго, што галаты пасля таго, як пазналі і прынялі праўду Хрыста, «дазволілі прывабіць сябе падманлівымі прапановамі, перайшоўшы ад свабоды да рабства: ад прысутнасці Езуса, якая вызваляе, да няволі граху, легалізму і гэтак далей», — дадаў Святы Айцец.
Ён нагадаў, што апостал Павел заклікаў вернікаў трываць у свабодзе, атрыманай з хростам, каб не трапілі зноў пад «ярмо няволі». Ён быў «раўнівым адносна свабоды» і разумеў, што некаторыя «фальшывыя браты» закраліся ў супольнасць для таго, каб парушыць свабоду, якую галаты мелі ў Езусе Хрысце.
«Прапаведванне, якое выключае свабоду ў Хрысце, ніколі не можа быць евангельскім <…>.
Ніколі нельга прымушаць у імя Езуса; нікога нельга рабіць нявольнікамі ў імя Езуса, які вызваліў нас», — дадаў Святы Айцец.
На думку Папы, па гэтай прычыне святы Павел заклікаў галатаў трываць у Езусе, «крыніцы праўды, якая робіць свабоднымі».
«Такім чынам, хрысціянская свабода грунтуецца да двух фундаментальных стаўпах: першы — ласка Пана Езуса; другі — праўда, якую адкрывае Хрыстус <…> і якой з’яўляецца Ён сам», — сказаў Папа Францішак.
Святы Айцец патлумачыў, што свабода — гэта ў першую чаргу дар Пана, плён смерці і ўваскрасення Езуса, бо «самая сапраўдная свабода — свабода ад няволі граху, выплывае з Хрыстовага крыжа».
«Гэта не перастае здзіўляць нас: месца, дзе мы пазбаўляемся ўсялякай свабоды, гэта значыць смерць, можа стаць крыніцай свабоды. Вось таямніца любові Бога! <…> Езус рэалізаваў сваю поўную свабоду, аддаючы сябе на смерць; ведаючы, што толькі такім чынам можа здабыць жыццё для ўсіх», — нагадаў Пантыфік.
Гэтую таямніцу любові Бога святы Павел спазнаў на сабе, таму казаў галатам, што быў «укрыжаваны разам з Хрыстом» (Гал 2,19). «Ён ведаў, што ў гэтым акце найвышэйшай еднасці з Панам ён атрымаў самы вялікі дар у сваім жыцці: свабоду», — сцвердзіў Папа, заклікаўшы вернікаў наследаваць прыклад апостала.
«Хрысціянін з’яўляецца свабодным і павінен быць свабодным. Не будзем зноў станавіцца нявольнікамі прадпісанняў, дзівацкіх рэчаў», — заахвоціў пастыр паўсюднага Касцёла.
Другім стаўпом свабоды, паводле Папы, з’яўляецца праўда. Важна памятаць, што «праўда веры — гэта не абстрактная тэорыя, але рэчаіснасць жывога Хрыста, якая непасрэдным чынам датычыцца штодзённага і агульнага сэнсу асабістага жыцця».
«Праўда робіць свабодным у той меры, у якой перамяняе жыццё чалавека і скіроўвае яго да дабра. Каб быць па-сапраўднаму свабодным, трэба не толькі ведаць сябе на псіхалагічным узроўні, але ў першую чаргу ствараць праўду ў сабе на больш глыбокім узроўні, і тут, у сэрцы, адкрывацца ласцы Хрыста», — параіў Пантыфік.
На думку Папы, «праўда павінна непакоіць нас», павінна «пастаянна ставіць перад намі пытанні, каб мы маглі ўсё глыбей і глыбей разумець тое, кім з’яўляемся на самай справе».
«Шлях да праўды і свабоды — цяжкі і працягваецца ўсё жыццё», але на ім «нас вядзе і падтрымлівае Любоў, што выплывае з крыжа: любоў, якая адкрывае нам праўду і дорыць свабоду. І гэта шлях шчасця. Праўда робіць нас свабоднымі, радаснымі і шчаслівымі», — сказаў на завяршэнне катэхезы Папа Францішак.
