У межах Года Сям’і Amoris lætitia і падрыхтоўкі да Дзясятай сусветнай сустрэчы сем’яў, якую плануецца правесці ў чэрвені наступнага года, ініцыявана распрацоўка Глабальнай каталіцкай дамовы на карысць сям’і (Patto Cattolico Globale sulla Famiglia).
Як паведаміла 7 жніўня Беларуская рэдакцыя парталу Vatican News, дакумент будзе ўяўляць сабой праграму дзеянняў па падтрымцы інстытуту сям’і ў святле сацыяльнага вучэння Касцёла.
Ініцыятарам яго прыняцця выступілі ватыканскія і міжнародныя каталіцкія ўстановы, такія як Дыкастэрыя па справах свецкіх, сям’і і жыцця, Папская акадэмія жыцця і Міжнародны цэнтр даследаванняў інстытуту сям’і (CISF).
У падрыхтоўцы Дамовы возьмуць удзел каталіцкія ўніверсітэты з розных краін свету. Праз адмысловыя даследчыя цэнтры яны павінны сабраць інфармацыю і навуковыя дадзеныя адносна сямейных адносін, сацыяльнай каштоўнасці інстытуту сям’і, добрых прыкладаў палітыкі падтрымкі сем’яў на мясцовым і міжнародным узроўнях. На падставе гэтай інфармацыі будзе адбывацца далейшая праца над Дамовай.
Дакумент будзе прадстаўлены на заканчэнне Дзясятай сусветнай сустрэчы сем’яў, якая пройдзе 22–26 чэрвені 2022 года. Сямейны форум будзе адбывацца адначасова ва ўсіх дыяцэзіях свету, але яго галоўныя падзеі пройдуць у Рыме з удзелам Святога Айца.
