Дзяржсакратар Яго Святасці Папы Францішка кардынал П’етро Паралін выступіў за спыненне агню на Блізкім Усходзе, дзе ў апошнія дні аднавіліся ўзброеныя атакі.
«Гэты канфлікт нясе смерць і знішчэнне», — прыводзіць словы ватыканскага іерарха Каталіцкае інфармацыйнае агенцтва КАІ са спасылкай на партал Vatican News.
Кардынал Паралін нагадаў, што Папа Францішак і Святы Пасад «моцна занепакоены» сітуацыяй на Святой Зямлі, і заклікаў да неадкладнага спынення насілля паміж Ізраілем і Палестынай.
«Ватыкан не з’яўляецца пасярэднікам у вузкім значэнні гэтага слова, аднак хоча па меры сваіх магчымасцяў зрабіць усё, каб зменшыць канфлікт у духу выйсця, заснаванага на ідэі дзвюх дзяржаў»,— сказаў кардынал.
Як дадаў іерарх, ён плануе закрануць гэтую тэму падчас сустрэчы са старшынёй Еўрапейскай камісіі Урсулай фон дэр Ляен, якую чакаюць у Ватыкане. Папа Францішак прыме яе на аўдыенцыі 22 мая.
