«Памолімся разам, каб мы перажылі сакрамэнт пакаяння з новай глыбінёй і такім чынам пакаштавалі бясконцую Божую міласэрнасць», — заахвоціў Папа Францішак у паведамленні ў Twitter.
Як паведамляе каталіцкае інфармацыйнае агенцтва КАІ, публікацыя Пантыфіка ў Twitter звязана з яго малітоўнымі інтэнцыямі на сакавік. «У цэнтры споведзі знаходзіцца Езус, які чакае нас, слухае нас і нам прабачае», — адзначае Святы Айцец.
«Калі я іду да споведзі, то дзеля таго, каб зведаць аздараўленне, вылечыць маю душу. Каб выйсці з большым духоўным здароўем. Каб перайсці ад убогасці да міласэрнасці», — тлумачыць Папа ў кароткім відэа, што прадстаўляе інтэнцыі Сусветнай сеткі Папскай малітвы на сакавік.
Пантыфік падкрэслівае, што «цэнтрам споведзі з’яўляюцца не грахі, якія мы называем, а Божая любоў, якую атрымліваем і якая заўсёды нам патрэбна».
«Будзем памятаць: мы ў сэрцы Езуса раней за нашыя памылкі», — дадаў Святы Айцец, а таксама заклікаў маліцца, «каб Бог даў свайму Касцёлу міласэрных святароў, а не абвінаваўцаў».
