Як сказаў пасол Казахстана пры Апостальскай Сталіцы, існуе «вялікая надзея», што Папа Францішак наведае гэтую краіну ў наступным годзе, калі дазволіць сітуацыя, звязаная з пандэміяй каранавірусу.
Па інфармацыі Каталіцкага інфармацыйнага агенцтва КАІ, Алібек Бакаеў адзначыў, што яго радзіма плануе арганізаваць сёмае пасяджэнне Кангрэсу лідараў сусветных і традыцыйных рэлігій у чэрвені 2021 г. і чакае, што Папа Францішак возьме ў ім удзел.
«Мы вельмі спадзяемся, што ў праграме Папы знойдзецца магчымасць наведаць Казахстан», — сказаў Бакаеў.
Ён дадаў, што гэта будзе гістарычны візіт, які супадзе з 20-годдзем першага візіту Папы ў гэтую краіну (Яна Паўла ІІ, з 22 па 25 верасня 2001 г.).
Як адзначыў дыпламат у інтэрв’ю тэлеканалу EWTN 4 снежня, ён спадзяецца, што ў межах візіту Папы будзе магчыма падпісаць шэраг розных двухбаковых дакументаў, у прыватнасці Мемарандум аб узаемаразуменні і супрацоўніцтве ў некаторых галінах: навуцы, адукацыі, медыцыне.
Існуюць таксама меркаванні, што ў сталіцы Казахстана магла б адбыцца з гэтай нагоды сустрэча Святога Айца з Патрыярхам Маскоўскім і ўсяе Русі Кірылам. Па словах Бакаева, візіт Папы будзе «асаблівай падзеяй не толькі для католікаў Казахстана, але і для ўсяго рэгіёну Сярэдняй Азіі».
У Казахстане пяць каталіцкіх дыяцэзій і каля 250 тысяч католікаў лацінскага абраду, паводле статыстыкі 2008 г., якія ўтвараюць невялікую меншасць з 18,28 мільёнаў жыхароў.
Этнічныя казахі ў асноўным з’яўляюцца мусульманамі-сунітамі.
Паводле перапісу 2009 г., другімі па колькасці з’яўляюцца ў краіне вернікі Рускай Праваслаўнай Царквы, да якой належаць больш за 20 працэнтаў жыхароў. Таксама там пражывае шмат імігрантаў.
У мінулым годзе Папа Францішак стварыў Апостальскую адміністратуру для католікаў візантыйскага абраду ў Карагандзе ў Казахстане, таму што расце колькасць украінскіх грэка-католікаў, якіх там каля 10 тысяч.
Апостальская Сталіца ўстанавіла дыпламатычныя стасункі з Рэспублікай Казахстан у кастрычніку 1992 г., усяго праз дзесяць месяцаў пасля яе ўтварэння ў снежні 1991 г.
