У разважанні перад малітвай «Анёл Панскі» 6 снежня Папа Францішак адзначыў, што ў Святым Пісанні навяртанне — гэта змена кірунку і спосабу мыслення.
Як паведамляе беларуская рэдакцыя парталу Vatican News, у разважанні Пантыфік разважаў над Евангеллем Другой нядзелі Адвэнту (Мк 1, 1-8) і нагадаў яго галоўны пасыл — патрэбу кожнага ў навяртанні.
«У маральным і духоўным жыцці навяртанне азначае зварот ад зла да дабра, ад граху да Божай любові. Гэтаму вучыў Ян Хрысціцель, які ў Юдэйскай пустыні „абвяшчаў хрост пакаяння для адпушчэння грахоў“. Хрост быў знешнім і бачным знакам навяртання тых, хто слухаў яго пропаведзь і вырашыў пакаяцца. Хрост адбываўся праз акунанне ў ваду, але заставаўся бескарысным, калі не было гатоўнасці пакаяцца і змяніць сваё жыццё», — заўважыў Папа.
«Навяртанне ўключае боль за здзейсненыя грахі, жаданне вызваліцца ад іх, дазвол назаўсёды выключыць іх са свайго жыцця.
Каб пазбавіцца граху, мы таксама павінны адкінуць усё, што з ім звязана: мысленне гэтага свету, празмерную прывязанасць да камфорту, задавальнення, матэрыяльнага дабрабыту, багацця»,
— падкрэсліў Святы Айцец.
І тут, па яго словах, Ян Хрысціцель, чалавек, які «адмаўляецца ад лішняга і шукае неабходнае», для хрысціян з’яўляецца першым прыкладам, бо галоўная рыса навяртання, як заўважыў Папа, — «адарванасць ад граху і свецкасці».
Іншы аспект навяртання, на які звярнуў увагу Пантыфік, — гэта пошук Бога і Яго Валадарства. «Адмова ад камфорту і свецкага менталітэту не з’яўляецца самамэтай, але накіравана на дасягненне нечага большага: Божага Валадарства, камуніі з Богам, сяброўства з Богам. Але гэта няпроста, таму што існуе мноства рэчаў, якія набліжаюць нас да граху: непастаянства, расчараванне, злосць, шкоднае асяроддзе, дрэнны прыклад. Часам цяга, якую мы адчуваем да Пана, занадта слабая і амаль здаецца, што Бог маўчыць; Яго абяцанні суцяшэння падаюцца нам далёкімі і нерэальнымі <...>.
І тады ў нас узнікае спакуса сказаць, што немагчыма па-сапраўднаму навярнуцца»,
— дадаў пастыр паўсюднага Касцёла.
Папа прапанаваў у такіх выпадках перш за ўсё памятаць, «што навяртанне — гэта ласка», і «прасіць у Бога сілы». «Мы навяртаемся па-сапраўднаму ў той ступені, у якой адкрываемся на прыгажосць, дабро і пяшчоту Бога», — заўважыў ён.
«Найсвяцейшая Марыя, якую паслязаўтра будзем ушаноўваць ва ўрачыстасць Беззаганнага Зачацця, няхай дапамагае нам усё больш і больш аддзяляцца ад граху і мірскога і адкрывацца для Бога, Яго слова, Яго любові, якая аднаўляе і збаўляе», — завяршыў сваё разважанне Пантыфік.
Таксама ён звярнуў увагу на ялінку і батлейку, якую ў гэтыя дні ўстанаўліваюць на галоўнай ватыканскай плошчы. «Гэтыя два калядныя сімвалы таксама прысутнічаюць у многіх дамах, на радасць дзецям — і нават дарослым. Яны з’яўляюцца прыкметай надзеі, асабліва ў гэты цяжкі час», — адзначыў Папа.
Ён заклікаў «не спыняцца на знаках, але ісці да сэнсу, да Езуса: да Божай любові, якую Ён нам адкрыў, да бясконцай дабрыні, ззянне якой Ён паказаў свету».
«Няма такой пандэміі, няма такога крызісу, які мог бы згасіць гэтае святло.
Дазволім жа яму ўвайсці ў нашыя сэрцы: працягнем руку тым, каму гэта больш за ўсё патрэбна, каб Бог зноў нарадзіўся ў нас і сярод нас», — сказаў Пантыфік.
