Папа Францішак патэлефанаваў да маці, якая ў аўтамабільнай аварыі страціла сына, каб суцешыць і падтрымаць жанчыну.
Так Святы Айцец адрэагаваў на ліст, які яна яму даслала, распавёўшы ў ім пра трагедыю сваёй сям’і і выкліканы ёю крызіс веры.
Пра гэта 29 ліпеня паведаміла польская рэдакцыя парталу Vatican News.
21-гадовы Фабрыцыё Бітэта трагічна загінуў у кастрычніку мінулага года. «Месяцы пасля яго смерці сталі самым чорным перыядам майго жыцця. Я раззлавалася на Бога, прыбрала з дома крыж. Пакінула толькі фігурку Маці Божай, бо Яна ведае, што значыць страціць Сына», — кажа Чынцыя, дадаючы, што пра ўсё гэта напісала Папу Францішку. Акрамя таго, яна папрасіла яго аб малітоўнай падтрымцы і сустрэчы.
Святы Айцец некалькі разоў спрабаваў датэлефанавацца да жанчыны, а калі, нарэшце, яму гэта ўдалося, ён сказаў, што размаўляе з ёю, гледзячы на здымак яе сына, які яна ўклала ў ліст.
«Я яму казала пра наш боль, пра бунт супраць Бога. Ён не асуджаў; сказаў, што гэта нармальна, што час загоіць рану. Паабяцаў, што будзе за нас маліцца, і сам папрасіў аб малітве», — распавяла Чынцыя. Яна прызналася, што размова са Святым Айцом стала для яе і яе мужа праменьчыкам надзеі.
Папа паабяцаў сужонкам, што, як толькі скончацца абмежаванні, звязаныя з пандэміяй, ён запросіць іх у Ватыкан на супольную малітву.
