![](/3/images/news/2020/04/2020-04-28-articleimage.jpg)
Папа Францішак заснаваў Ватыканскі фонд Яна Паўла I з мэтай даследавання і папулярызацыі асобы, думкі і вучэння Альбіно Лучані, кароткі пантыфікат якога працягваўся 33 дні: з 26 жніўня па 28 верасня 1978 года.
Як паведаміла 28 красавіка беларуская рэдакцыя парталу Vatican News, новая структура будзе займацца захаваннем культурнай і рэлігійнай спадчыны, пакінутай Янам Паўлам I; развіваць ініцыятывы, праводзіць навуковыя канферэнцыі, сустрэчы, семінары; устанаўліваць узнагароды і стыпендыі; клапаціцца пра выдавецкую дзейнасць, публікуючы вынікі даследаванняў; садзейнічаць асобам і ўстановам, якія працуюць з тымі ж мэтамі.
Кіраваць Фондам будзе Дзяржсакратар Яго Святасці. Кардынал П’етро Паралін лічыць, што вучэнне Яна Паўла І застаецца актуальным: «Блізкасць, пакора, прастата, адданасць Божай міласэрнасці, любоў да бліжняга і салідарнасць — гэта яго характэрныя рысы».
«Гэта пастыр, блізкі людзям, арыентаваны на сутнасць веры, з надзвычайнай сацыяльнай адчувальнасцю»,
— зазначыў найбліжэйшы супрацоўнік Святога Айца.
«Гэта біскуп, які жыў досведам Другога Ватыканскага Сабора, рэалізаваў яго і падчас свайго кароткага пантыфікату дабіўся прагрэсу Касцёла на асноўных шляхах, указаных ім: імкненне да крыніц Евангелля і новая місіянерская прырода, біскупская калегіяльнасць, служэнне ў касцёльнай беднасці, пошук хрысціянскай еднасці, міжрэлігійны дыялог, дыялог з сучасным светам і міжнародны дыялог, які павінен весціся з настойлівасцю і рашучасцю, на карысць справядлівасці і міру», — дадаў кардынал Паралін.
Існаванне Фонда важнае таксама ў кантэксце беатыфікацыйнага працэсу Яна Паўла I, які працягваецца з 2002 г., у тым ліку з пункту гледжання важнай гістарычнай і гістарыяграфічнай даследчай працы.