Сусветная сустрэча сем’яў, якая павінна была адбыцца ў наступным годзе ў Рыме, перанесена на 2022 год, а Сусветныя дні моладзі ў Лісабоне — на 2023.
Пандэмія каранавірусу прымусіла арганізатараў дзвюх найважнейшых касцёльных падзей бліжэйшага часу перагледзець планы. Як паведаміла італьянская рэдакцыя парталу Vatican News, 20 красавіка кіраўнік прэс-службы Святога Пасаду Матэо Бруні растлумачыў рашэнне Папы Францішка.
«У сувязі з цяперашняй санітарнай сітуацыяй і яе наступствамі для перамяшчэння і збору моладзі і сем’яў Святы Айцец разам з Дыкастэрыяй па справах свецкіх, сям’і і жыцця палічыў неабходным адкласці на год бліжэйшую Сусветную сустрэчу сем’яў, якую планавалася правесці ў Рыме ў чэрвені 2021 года, і бліжэйшыя Сусветныя дні моладзі, якія планавалася правесці ў Лісабоне ў жніўні 2022, на чэрвень 2022 года і жнівень 2023 года адпаведна», — паведаміў кіраўнік ватыканскай прэс-службы.
