4 верасня папа Францішак скіраваўся ў сваё 31-е Апостальскае падарожжа, падчас якога наведае тры афрыканскія краіны: Мазамбік, Мадагаскар і Маўрыкій. Пералёт зойме больш за дзесяць гадзін.
Як паведамляе італьянская рэдакцыя парталу Vatican News, перад пачаткам падарожжа Пантыфік сустрэўся з дванаццаццю мігрантамі з гэтых краінаў, якія ў 80-я гады мінулага стагоддзя наведваў яго папярэднік святы Ян Павел ІІ. За больш як 30 гадоў сітуацыя на кантыненце моцна змянілася, і сёння перад абліччам новых выклікаў візіт папы Францішка асабліва актуальны.
Самалёт са Святым Айцом на борце вылецеў з Рыма раніцай і толькі ўвечары, праз больш за дзесяць гадзін палёту, прызямліцца ў Мапуту, сталіцы Мазамбіка. Трохдзённы візіт у гэтую краіну стане першым этапам Апостальскага падарожжа і пройдзе пад дэвізам «Надзея, мір і прымірэнне».
Плануецца, што 7–8 верасня папа Францішак наведае Мадагаскар, а 9 верасня — Маўрыкій.
Перад вылетам пастыр паўсюднага Касцёла заклікаў вернікаў маліцца, «каб Бог, Айцец усіх, кансалідаваў людзей ва ўсёй Афрыцы і даў братняе прымірэнне — адзіную надзею на моцны і трывалы мір».
Падарожжа, якое распачынаецца сёння, стане ўжо чацвёртым Апостальскім візітам папы Францішка ў Афрыку. У сакавіку ён ужо наведаў Марока, два гады таму пабываў у Егіпце, а ў лістападзе 2015 г. нанёс візіты ў Кенію, Уганду і Цэнтральна-Афрыканскую Рэспубліку.
