З чэрвеня стартуе новы праект каталіцкага тэлебачання — праграма «Каталізатар». Гэта хрысціянскі відэаблог, які будзе размяшчацца і выходзіць на Ютуб-канале Catholic.by.
Фармат блога: навукова-папулярныя рэлігійна-філасофскія відэа, разлічаныя не толькі на практыкуючых католікаў, а на шырокую аўдыторыю, у тым ліку і на людзей, якія яшчэ не сустрэліся ў сваім жыцці з жывым Богам.
«Каталізатар» пакліканы стаць адказам на штораз больш агрэсіўную ў наш час атэістычную прапаганду і блюзнерскі кантэнт, які бесперашкодна распаўсюджваецца ў сродках камунікацыі.
Праграма мае на мэце разбураць памылковыя стэрэатыпы пра веру і Касцёл і змагацца з рознага кшталту хлуснёй на тэму рэлігіі. У ёй будзе не толькі апалагетыка хрысціянскага вучэння і папулярна прадстаўленыя багаслоўскія тэмы, але таксама інфармацыя пра гісторыю і сучаснасць хрысціянства і супольнасці вернікаў.
Далучайцеся! Падпісвайцеся на наш канал на Ютуб! Каталізуйцеся!
