14 мая ў сядзібе Апостальскай нунцыятуры ў Мінску прайшла чарговая сустрэча прадстаўнікоў мужчынскіх і жаночых манаскіх інстытутаў і таварыстваў апостальскага жыцця ў Беларусі.
У сустрэчы ўзялі ўдзел старшыня Канферэнцыі Каталіцкіх Біскупаў у Беларусі арцыбіскуп Тадэвуш Кандрусевіч і біскуп Аляксандр Яшэўскі SDB. Распачаўся сход Эўхарыстыяй, цэлебрацыю якой узначаліў прадстаўнік папы Францішка ў Беларусі арцыбіскуп Габар Пінтэр.
На пачатку Апостальскі нунцый прывітаў удзельнікаў такімі словамі:
«Мы пачынаем гэты сход, як першыя хрысціяне, цэлебрацыяй святой Эўхарыстыі. Эўхарыстыя азначае „падзяка“. І менавіта гэта перш за ўсё нас яднае. Пасхальная радасць, агульная вера, агульнае пакліканне да асаблівага служэння складаюць фундамент усяго, што мы робім, як індывідуальна, так і супольна».
Асноўнай мэтай ініцыятывы, якая аб’ядноўвае прадстаўнікоў мужчынскіх і жаночых манаскіх інстытутаў і таварыстваў апостальскага жыцця ў Беларусі, з’яўляецца больш эфектыўная каардынацыя дзейнасці паміж паасобнымі інстытутамі кансэкраванага жыцця і іерархамі Каталіцкага Касцёла.
Згодна з парадкам дня асамблея адзінагалосна зацвердзіла канчатковую рэдакцыю Статута Каардынацыйнай групы вышэйшых настаяцеляў, дэлегатаў і прадстаўнікоў мужчынскіх і жаночых манаскіх інстытутаў і таварыстваў апостальскага жыцця ў Беларусі, які ў бліжэйшы час будзе перасланы ў адпаведную дыкастэрыю Святога Пасаду для яго зацвярджэння.
Згодна з нормамі новапрынятага дакумента шляхам галасавання прадстаўнікі манаскіх інстытутаў выбралі новае кіраўніцтва Каардынацыйнай групы.
Старшынёй абраны кс. Віктар Гайдукевіч SDB, яго намеснікам — с. Любаміра Кругавая ОР, сакратаром — с. Марцэліна Мігач ISSM.
Акрамя таго, былі выбраныя прадстаўнікі ад кожнай дыяцэзіі: кс. Анджэй Юхневіч ОМІ — прадстаўнік Віцебскай дыяцэзіі, кс. Ян Этэль SCІ — прадстаўнік Гродзенскай дыяцэзіі, кс. Алег Шпець SChr — прадстаўнік Мінска-Магілёўскай архідыяцэзіі, с. Таццяна Касабуцкая CSCII — прадстаўніца Пінскай дыяцэзіі.
Удзячныя папярэдняй Радзе каардынацыйнай групы на чале з кс. Міхалам Цвячкоўскім МІС, прадстаўнікі манаскіх супольнасцяў пажадалі благаслаўлёнай і плённай працы кс. Віктару Гайдукевічу і новай Радзе.
Звяртаючыся да ўдзельнікаў сустрэчы, Апостальскі нунцый арцыбіскуп Габар Пінтэр сказаў:
«Карыстаючыся нагодай, я ўсім сэрцам прагну падзякаваць вам ад імя папы Францішка і ад сябе асабіста, дарагія, за вашае адданае і ахвярнае служэнне. Прашу вас перадаць гэтыя словы кожнаму члену вашых ордэнаў: падзяку, пашану і духоўную блізкасць».
