Новым дырэктарам «Радыё Марыя» стаў кс. Аляксандр Фаміных.
У сувязі з новым прызначэннем на старонцы «Радыё Марыя» адзначаецца:
«Удзячныя Богу за гэтага святара, які ад першага моманту існавання на Беларусі „Радыё Марыя“ паверыў у гэты праект і неаднойчы падкрэсліваў яго значнасць у галіне евангелізацыі. Два гады ён заўжды адказна рыхтаваў і працягвае рыхтаваць для радыё катэхезы.
А сёння мы шчыра вітаем ксяндза Аляксандра ў камандзе „Радыё Марыя“ і крочым разам далей, каб развівацца і працаваць на хвалу Пану!
Кожны будні дзень а 10-й гадзіне разам з дырэктарам пачынаем малітвай у прамым эфіры. Запрашаем!»
Кс. Аляксандр Фаміных у мінулым годзе адзначыў 60 гадоў з дня нараджэння і 10 гадоў святарства. Святар працяглы час займаў пасаду дырэктара дабрачыннага каталіцкага таварыства «Caritas» Мінска-Магілёўскай архідыяцэзіі, а цяпер з'яўляецца пробашчам парафіі Багародзіцы Апякункі сем’яў у Ждановічах, што пад Мінскам.
