Як паведамляе партал Catholicnews.by, 28 красавіка ў катэдральным касцёле Езуса Міласэрнага ў Віцебску дыяканскае пасвячэнне з рук біскупа Алега Буткевіча атрымаў Алег Зямчонак, ураджэнец а.г. Парыж Пастаўскага раёна.
Фармацыю кандыдат да святарства праходзіў у духоўных семінарыях у Пінску і ў Санкт-Пецярбургу (Расія).
У парафіяльную ўрачыстасць Божай Міласэрнасці ў цэлебрацыі св. Імшы разам з Віцебскім біскупам бралі ўдзел кс. Канстанцін Перэдэрый, рэктар духоўнай семінарыі «Марыя Каралева Апосталаў» у Санкт-Пецярбургу, кс. Уладзімір Заянчкоўскі з Лепеля, былы пробашч у Парыжы, пры якім дыякан Алег распазнаў сваё пакліканне, кс. Валерый Орсік з Оршы і афіцыял біскупскага суда кс. Аляксей Ляшко.
Пасля літургіі слова кс. Валерый, у парафіі якога семінарыст апошні час праходзіў практыку, звярнуўся да біскупа з просьбай удзяліць пасвячэнне дыяканату і засведчыў, што кандыдат падрыхтаваны і гатовы прыняць пасвячэнне.
Пасля прадстаўлення кандыдата пастыр дыяцэзіі прамовіў гамілію, у якой засяродзіўся на паходжанні і значэнні дыяканскага служэння ў Касцёле.
Непасрэдна перад абрадам пасвячэння кандыдат публічна даў абяцанні выконваць усе абавязкі даручанага яму служэння, захоўваючы цэлібат і штодзённа молячыся Літургію гадзінаў.
На заканчэнне ўрачыстасці новапасвячаны дыякан Алег скіраваў словы ўдзячнасці Богу, сваёй маці, а таксама біскупу Алегу і ўсім прысутным на ўрачыстасці святарам і вернікам.
