Напярэдадні Вялікадня пробашч парафіі Маці Божай Будслаўскай на Каменнай Горцы ў Мінску ксёндз канонік Францішак Рудзь наведаў Акадэмію Міністэрства ўнутраных спраў Рэспублікі Беларусь. На сустрэчы з курсантамі святар распавёў пра каталіцкія традыцыі святкавання Пасхі.
У сучасным беларускім грамадстве вялікае значэнне мае духоўнае выхаванне падрастаючага пакалення. У бліжэйшай будучыні маладыя людзі стануць асновай нашага грамадства, стварыўшы сем'і і пачаўшы прафесійную дзейнасць. Таму для многіх навучальных устаноў важным з'яўляецца ўдзел прадстаўнікоў рэлігійных інстытутаў у духоўным выхаванні моладзі. Гісторыя і вопыт пакаленняў паказваюць, што на працягу многіх стагоддзяў на беларускіх землях выхаванне духоўнасці непарыўна было звязана з любоўю да Бога і Радзімы.
Ксёндз Францішак Рудзь ужо не першы раз наведвае Акадэмію МУС РБ. У гэты раз прадметам размовы з курсантамі і афіцэрска-выкладчыцкім складам стала галоўнае свята хрысціянства — Уваскрасенне Хрыста.
Святар распавёў пра традыцыі падрыхтоўкі да свята ў розных краінах свету і на тэрыторыі Беларусі, пра тое, як правільна правесці апошнія дні Вялікага посту. Вялікдзень не з'яўляецца аднадзённай падзеяй, а ўключае ў сябе і пост, падчас якога кожнаму чалавеку шчыра і з поўнай адказнасцю трэба падрыхтаваць сваю душу і цела.
Святар патлумачыў сэнс урачыстасці Змёртвыхпаўстання Пана, раскрыў сімволіку велікоднай ежы і адказаў на пытанні слухачоў.
«Свята нагадвае кожнаму з нас пра чароўны дар неўміручасці праз уваскрасенне душы. У гэты дзень ва ўсіх касцёлах свету хрысціяне ўспамінаюць падзею, якая стала паваротным момантам у гісторыі чалавецтва. Езус Хрыстус, Сын Божы, уваскрос з мёртвых, каб даць чалавеку магчымасць вечнага жыцця», — адзначыў ксёндз Францішак Рудзь.
