Як паведаміла 4 красавіка прэс-служба Апостальскага візітатара для грэка-католікаў Беларусі кс. архімандрыта Яна Сяргея Гаека МІС, беларускія католікі ўсходняга абраду салідарныя з заявай Старшыні ККББ арцыбіскупа Тадэвуша Кандрусевіча адносна сітуацыі ў Курапатах і далучаюцца да малітвы перапрашэння за блюзнерчыя дзеянні ў святым месцы.
Паведамленне прэс-службы
Апостальскага візітатара для грэка-католікаў Беларусі архімандрыта Сяргея (Гаека)
Раніцай 4 красавіка 2019 года ва ўрочышчы Курапаты пад Мінскам, у месцы загубы ахвяр палітычных рэпрэсій 1930–1940-х гадоў, пачаўся дэмантаж і вываз крыжоў, якія былі ўсталяваныя грамадскасцю на працягу некалькіх гадоў. Дагэтуль невядома мэта гэтага акту.
Крыж для хрысціянаў з’яўляецца святым сімвалам пакуты і збаўчай смерці Госпада нашага Ісуса Хрыста. Для ўсіх людзей абсягу хрысціянскай цывілізацыі крыж з’яўляецца сімвалам памяці памерлых, асабліва тых, якія памерлі ад несправядлівага насілля.
Курапаты — гэта месца памяці пацярпелых людзей усіх нацыянальнасцей і рэлігій, месца болю для многіх беларускіх грамадзянаў, продкі якіх пацярпелі ад жахлівых і несправядлівых сталінскіх рэпрэсій у першай палове ХХ стагоддзя.
Важнасць гэтага памятнага месца адзначана беларускай дзяржавай, якая ўключыла гэтае месца ў спіс гісторыка-культурных каштоўнасцей пад катэгорыяй 1, якая надае помніку міжнароднае значэнне.
У сувязі са зносам крыжоў, усталяваных грамадскасцю ва ўрочышчы Курапаты, мы поўнасцю салідарныя з Заявай Старшыні Канферэнцыі Каталіцкіх Біскупаў у Беларусі арцыбіскупа Тадэвуша Кандрусевіча, Мітрапаліта Мінска-Магілёўскага, які, між іншым, напісаў:
«Заклікаю адказных за знос крыжоў тэрмінова спыніць гэтыя дзеянні і шляхам дыялогу розных палітычных і грамадскіх сіл з удзелам прадстаўнікоў розных веравызнанняў распачаць працэс урэгулявання сітуацыі».
Апостальскі візітатар для грэка-католікаў Беларусі архімандрыт Сяргей (Гаек) блаславіў вернікаў, якія праз строгі пост у пятніцу 5 красавіка 2019 г., праз малітву і праз руплівае пакланенне Крыжу Хрыстоваму ў бліжэйшыя дні, уключна з нядзеляй 7 красавіка 2019 г., бачаць абавязак перапрасіць Бога за гэты блюзнерчы акт зносу крыжоў у Курапатах.
Протапрэзбітар Яўген Усошын
Прэс-служба Апостальскага візітатара для грэка-католікаў Беларусі
Мінск, 4 красавіка 2019.
