4 красавіка 50-гадовы юбілей з дня нараджэння адзначае біскуп Юзаф Станеўскі, Генеральны сакратар Канферэнцыі Каталіцкіх Біскупаў у Беларусі.
«Благаслаўлёны Бог і Айцец Пана нашага Езуса Хрыста, які благаславіў нас у Хрысце ўсялякім духоўным благаслаўленнем на нябёсах і выбраў нас у Ім перад стварэннем свету, каб мы былі святымі і беззаганнымі перад Ім у любові» (Эф 1, 3–4).
Сёння мінае роўна 50 гадоў, калі ўвечары Вялікай пятніцы ў сям’і Рамуальда і Гэлены Станеўскіх нарадзіўся хлопчык, які стаў чацвёртым дзіцём у гэтай пабожнай каталіцкай сям’і. На святым хросце, які адбыўся 13 мая 1969 г. у парафіяльным касцёле Найсвяцейшага Сэрца Пана Езуса i св. Язафата ў Заневічах, нованароджаны атрымаў імя Юзаф.
У залаты 50-гадовы юбілей біскупа Юзафа Станеўскага рэдакцыя партала Catholic.by дзякуе Богу за той вялікі дар, якім гэты пастыр з’яўляецца не толькі для Гродзенскай дыяцэзіі, але для ўсяго Касцёла на Беларусі, і атуляе яго сваёй малітвай.
Шчыра дзякуем і Вам, Ваша Эксцэленцыя, за Вашае ахвярнае служэнне, за сэрца і за жыццё, якое ахвяравалі Богу і Касцёлу; за тое, што дзеліцеся з намі цеплынёю свайго сэрца і сваімі цікавымі разважаннямі над верай і жыццём. Няхай Хрыстус умацоўвае Вас на гэтым шляху, для якога Вас выбраў і паставіў, а Маці Божая няхай атуліць Вас і Вашае служэнне сваёй матчынай апекай.
