З 15 па 17 сакавіка ў кляштары сясцёр змёртвыхпаўстанак у Наваполацку адбыліся рэкалекцыі для моладзі. 10 маладых людзей пакінулі свае штодзённыя клопаты, каб апынуцца ў «Егіпце» і зразумець, што з’яўляецца іх няволяй, — у адпаведнасці з тэмай рэкалекцый.
Духоўныя практыкаванні пачаліся з адарацыі крыжа.
Гэта быў момант сустрэчы з асабістым духоўным «Егіптам»: момант усведамлення, што я знаходжуся ў няволі ўласных страхаў, залежнасцяў, а самае галоўнае — у няволі граху.
Гэта быў таксама час выбару, выпрабавання і перамогі; час Хрыста і кожнага ўдзельніка. На знак гатоўнасці сустрэцца з уласным «Егіптам — месцам няволі» кожны з прысутных мог забіць у дрэва крыжа цвік.
Удзельнікаў суправаджаў у гэтай вандроўцы Майсей, які на ўласным вопыце ведае, што «цёмныя ночы» з’яўляюцца момантам збаўлення, ведае, што калі сказаць Богу «так», то ўсё атрымаецца — галоўнае не згубіць Яго з вачэй і мець цярплівасць да сябе. Майсей дапамагаў маладым людзям зразумець, што кожны з’яўляецца выбраным і асаблівым для Бога і што Стварыцель змагаецца за нас.
Галоўным момантам рэкалекцый была Эўхарыстыя. Падмацаваныя Целам і Крывёю Хрыста, удзельнікі маглі вырушыць у невядомае, зрабіць першы крок пераходу ад цемры да святла.
Вырашальным часам адказу на пытанне: «Выйсці або застацца?» была адарацыя Найсвяцейшага Сакрамэнту.
Падчас яе кожны вырашаў для сябе, хоча ён выйсці ці застацца ў «Егіпце — месцы няволі». У знак гатоўнасці пайсці ў невядомае можна было зрабіць сімвалічны крок насустрач Уваскросламу Пану і ў адказ на словы: «Я буду з табою» (пар. Зых 3, 12) разам з Майсеем і ўсім ізраэльскім народам заспяваць песню праслаўлення Пана за Яго вялікія рэчы.
Напэўна, рэкалекцыі працягнуцца ў штодзёным жыцці ўдзельнікаў, а таксама дадуць добрую магчымасць падчас Вялікага посту падрыхтавацца да асабістай сустрэчы з Уваскрослым Панам.
