14 сакавіка студэнты трэцяга, чацвёртага і пятага курсаў Вышэйшай духоўнай семінарыі імя св. Тамаша Аквінскага ў Пінску прынялі з рук біскупа Антонія Дзям’янкі паслугі лектарату і акалітату.
Святая Імша ў семінарыйнай капліцы Найсвяцейшага Імя Марыі, падчас якой былі ўдзелены паслугі, сабрала не толькі фарматараў і навучэнцаў, але таксама вернікаў пінскай катэдральнай парафіі.
У прамоўленай гаміліі біскуп Антоні падкрэсліў важнасць служэння лектараў і акалітаў як памочнікаў святароў.
Ардынарый адзначыў, што лектар — гэта той, хто не толькі абвяшчае Божае Слова, але і жыве яго моцай. Таксама і акаліт не толькі дапамагае ў цэлебрацыі Эўхарыстыі, але перадусім сам духоўна аднаўляецца праз яе.
Святая Імша з удзяленнем паслуг, што адбылася ў капліцы alma mater, стала для семінарыстаў чарговым крокам на шляху фармацыі да святарства. Пра вялікія дары абвяшчэння Божага Слова і паслузе падчас Эўхарыстыі, даручаныя ім Касцёлам, будучыя святары будуць разважаць падчас велікапосных рэкалецый, якія распачынаюцца ў семінарыйнай супольнасці ў пятніцу 15 сакавіка.
