10 сакавіка біскуп Пінскі Антоні Дзям’янка наведаў з кананічнай візітацыяй парафію Найсвяцейшага Сэрца Езуса ў в. Пелішча (Пінская дыяцэзія, Брэсцкі дэканат).
Вернікі парафіі на чале з пробашчам кс. Паўлам Ярашэвічам каля брамы касцёла віталі біскупа хлебам-соллю і шчырымі словамі. Перадаючы іерарху на час візітацыі ключы ад святыні, парафіяне выказалі словы, што сыходзілі з глыбіні сэрца: «Перадаем Вам ключы ад нашага касцёла, ключы, якія нікому і ніколі не ўдалося ад нас адабраць. Мы веру збераглі!»
Біскуп узначаліў цэлебрацыю Эўхарыстыі, падчас якой у гаміліі звярнуў увагу на вернасць Богу праз пераадоленне спакусаў і выпрабаванняў свету.
У прыклад ён прывёў мясцовую парафію, якая, нягледзячы на шматлікія спакусы і пагрозы атэістычнай сістэмы, засталася вернай свайму адзінаму Богу.
Напрыканцы святой Імшы іерарх падзякаваў вернікам за захаванне веры і перадачу яе наступнаму пакаленню. Таксама ён падзякаваў за духоўны плён жыцця парафіі, якім з’яўляецца навучэнец Вышэйшай духоўнай семінарыі ў Пінску Віталій Міцкевіч, адзначыўшы, што ён — духоўнае дзіця парафіі, якое неабходна няспынна падтрымліваць малітоўна.
Іерарх звярнуўся да вернікаў з просьбай працягваць маліцца за пакліканых да святарства і кансэкраванага жыцця, а таксама аб новых і шматлікіх пакліканнях да Божай службы.
У план візітацыі ўваходзілі сустрэча з прадстаўнікамі парафіі, адведванне хворай парафіянкі, якой біскуп удзяліў святую Камунію, наведванне навакольных вёсак Багдзюкі і Падлессе, якія належаць да мясцовай парафіі. Біскуп маліўся і размаўляў з жыхарамі гэтых вёсак, а ў Падлессі ўзначаліў святую Імшу.
На заканчэнне візітацыі іерарх разам з вернікамі накіраваўся на парафіяльныя могілкі, дзе адбылася малітва за памерлых.
Пасля біскуп запаліў зніч і ўсклаў кветкі на магіле святара.
