6 мая студэнты Міждыяцэзіяльнай вышэйшай духоўнай семінарыі імя св. Тамаша Аквінскага ў Пінску наведалі некаторыя парафіі г. Брэста і наваколля, каб падзякаваць вернікам за падтрымку і клопат пра будучых святароў.
Семінарысты не толькі прынялі ўдзел у нядзельных набажэнствах, але і падрыхтавалі для парафіянаў адмысловую евангелізацыйна-музычную праграму.
Асабліва шчымлівая сустрэча адбылася ў парафіі Найсвяцейшага Сэрца Езуса ў в. Пелішча (Камянецкі р-н). Вернікі старэйшага пакалення, сустракаючыся з семінарыстамі, са слязьмі на вачах дзякавалі Богу, што яны дачакаліся часоў, аб якіх яны і іх бацькі маліліся на працягу доўгіх дзесяцігоддзяў ночы атэізму.
Парафіяне ўспаміналі тыя страшныя часы, калі семінарыя ў Пінску была зачынена, святары былі рэпрэсаваныя або расстраляныя, парафіі паўстагоддзя заставаліся асірацелымі. На фоне гэтай драматычнай мінуўшчыны вельмі радаваліся сэрцы ўсіх сабраных на набажэнстве і адмысловым канцэрце праслаўлення Пана.
Гледзячы на новае пакаленне семінарыстаў, парафіяне абяцалі і надалей горача маліцца аб новых і шматлікіх пакліканнях да служэння Богу і людзям, асабліва ў нашай краіне, а таксама падтрымліваць на абраным шляху тых, хто ўжо рыхтуецца да святарства.
