Сёлета браслаўская парафія і ўся Віцебская дыяцэзія будуць перажываць 10-годдзе каранацыі папскімі каронамі абраза Маці Божай Валадаркі Азёраў.
З гэтай нагоды на сайце санктуарыя Маці Божай Валадаркі Азёраў у Браславе Waladarka.by з’явілася просьба да ўсіх жадаючых распавесці пра цуды, здзейсненыя ў іх жыцці праз заступніцтва Маці Божай.
«Калі жадаеце падзяліцца сведчаннямі свайго аздараўлення душы і цела альбо натхнёным вершам да Марыі, просім дасылаць вашыя лісты на электронную пошту wolodiasds@mail.ru або пакідаць у спецыяльнай скрыні для пытанняў у канцы касцёла ці прыносіць у сакрыстыю», — запрашаюць арганізатары.
Прымаюцца допісы любога жанру і фармату: сведчанні, эсэ ці вершы — усё, што датычыцца заступніцтва Маці Божай у браслаўскай іконе. Нават калі хтосьці мае, што распавесці, але пры гэтым не любіць пісаць, яго з радасцю паслухаюць і запішуць ягонае сведчанне.
Мэта збору сведчанняў людзей, якія атрымалі ад Бога ласкі праз заступніцтва Валадаркі Азёраў, — умацаванне веры іншых.
