15 студзеня ў Доме начнога знаходжання ў Мінску адбылася калядная сустрэча супрацоўнікаў і валанцёраў дабрачыннага каталіцкага таварыства Caritas з падапечнымі ўстановы.
Пасля дзялення аплаткамі і выказвання адзін аднаму віншаванняў са святамі Калядаў і Новага года адбылася традыцыйная вячэра, а таксама раздача падарункаў і сродкаў першай неабходнасці.
Праект «Сталовая для бяздомных» дзейнічае ўжо другі год. Кожны будзень пастаяльцам раздаюць гарачую ежу і піццё, якія гатуюць у цэнтры св. Лукі (в. Ляскоўка, вул. Карытас, 1). На раздачы дзяжураць валанцёры Caritas, якія гатовыя дзяліцца з людзьмі сваёй увагай, часам і адносінамі.
Акрамя ежы, бяздомныя атрымліваюць дапамогу па псіхалагічных і юрыдычных пытаннях, а таксама бясплатныя паслугі цырульніка.
Падтрымаць праект «Сталовая для бяздомных» можна праз сістэму АРІП (нумар паслугі 434 9831) ці па USSD-запыце для абанентаў МТС: *222*16# (сума 2 рублі = адна вячэра).
