Пошук


08.01.2019 10:25   Catholic.by

З 3 па 5 студзеня ў Лебедзеве прайшлі чарговыя рэкалекцыі для юнакоў, прысвечаныя распазнанню жыццёвага шляху.

Духоўныя практыкаванні былі арганізаваныя і праведзеныя пад кіраўніцтвам Душпастырства пакліканняў Мінска-Магілёўскай архідыяцэзіі.

Падчас рэкалекцый юнакі мелі магчымасць, пакінуўшы звычайны рытм свайго жыцця, больш часу прысвяціць слуханню Бога.

Асноўнай тэмай студзеньскай сустрэчы ў Лебедзеве была рэчаіснасць духоўнай барацьбы як неад’емнай часткі жыцця хрысціяніна, які хоча развівацца ў сваёй веры.

Ксёндз Павел Эйсмант, куратар першага курсу Міждыяцэзіяльнай духоўнай семінарыі, засяродзіўся на тым, якія магчымасці ў змаганні за паўнату жыцця сучаснаму верніку прапануе апостал Павел.

Святар таксама звярнуў увагу на тое, чаго неабходна асцерагацца, каб не трапіць у палон галоўнага ворага чалавека і яго збаўлення — д’ябла.

Да ўдзельнікаў рэкалекцый завітаў біскупскі вікарый для Магілёва і Магілёўскай вобласці біскуп Аляксандр Яшэўскі SDB, які падчас Эўхарыстыі, між іншым, звярнуў увагу на неабходнасць як мага больш часта ўдзельнічаць у святой Імшы, такім чынам прыпадаючы да крыніцы шматлікіх Божых ласкаў.

Рэкалекцыі сталі часам, калі маладыя людзі змаглі не толькі тэарэтычна пазнаваць праўды хрысціянскага жыцця, але і знаходзіць магчымасці іх рэалізацыі ў штодзённасці.

Абноўлена 08.01.2019 10:26
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання
. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.