Пошук


07.01.2019 14:57   Паводле: wsd.grodnensis.by / Фота: Яўген Амасёнак / Catholic.by

З 4 па 6 студзеня ў Вышэйшай духоўнай семінарыі ў Гродне адбыліся рэкалекцыі для юнакоў, прысвечаныя распазнанню паклікання, пад назвай «Не бойцеся, я абвяшчаю вам вялікую радасць... (Лк 2, 10)».

Удзел у гэтых духоўных практыкаваннях — неацэнны скарб для кожнага юнака, які ўсведамляе сваю адказнасць за выбар уласнай жыццёвай сцежкі і прагне ставіць Божую волю на першае месца.

Як паведамляе wsd.grodnensis.by, у межах рэкалекцый былі разважанне над Божым словам, святая Імша, адарацыя Найсвяцейшага Сакрамэнту, сустрэчы ў групах, канферэнцыі, індывідуальныя размовы з душпастырам пакліканняў кс. Андрэям Лішко і знаёмства з семінарыйным жыццём.

У першы дзень духоўных практыкаванняў сабраныя прынялі ўдзел у Эўхарыстыі, якую ўзначаліў біскуп Гродзенскі Аляксандр Кашкевіч. Гамілію прамовіў рэктар семінарыі ў Гродне кс. Віталь Вайцяхоўскі, паспрабаваўшы ў ёй запаліць у сэрцах удзельнікаў прагненне наследаваць Хрыста ў штодзённым жыцці.

Апошні дзень рэкалекцый стаў для юнакоў добрай нагодай яшчэ глыбей пазнаць саміх сябе, аднавіць сувязь з Хрыстом і зразумець тое, што Бог для кожнага чалавека падрыхтаваў асабісты і непаўторны шлях да святасці.

Кульмінацыйным момантам гэтага дня стала святая Імша, якую ўзначаліў дапаможны біскуп Гродзенскай дыяцэзіі Юзаф Станеўскі.

Пасля супольнай малітвы і сустрэчы ў групах адбылася інтэлектуальная гульня, у якой былі задзейнічаны амаль усе ўдзельнікі рэкалекцый. Падрыхтаваныя пытанні датычыліся не толькі рэлігійнага жыцця, але і літаратуры, хіміі, матэматыкі, гісторыі, мастацтва і г. д. Адказ на многія пытанні залежаў ад логікі і кемлівасці ўдзельнікаў.

Арганізатары сустрэчы маюць надзею, што час, праведзены ў сценах семінарыі, пакіне пасля сябе багаты духоўны досвед у жыцці юнакоў, якім яны будуць шчодра дзяліцца ў сваім асяроддзі.

Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа