3 студзеня арцыбіскуп Тадэвуш Кандрусевіч, Мітрапаліт Мінска-Магілёўскі, адзначаў дзень свайго нараджэння. Іерарх узначаліў святую Імшу ў мінскай архікатэдры Найсвяцейшага Імя Марыі.
У Каталіцкім Касцёле адзначаўся ў гэты дзень успамін Найсвяцейшага Імя Езуса.
Як сказаў іерарх у гаміліі, гэтым успамінам Касцёл паглыбляе праўду аб Богаўцелаўленні.
Імя, дадаў арцыбіскуп, павінна адлюстроўваць прыроду рэчы. Так, Адам у раі даў жывёлам імёны, якія выражалі іх сутнасць. Людзям, якія адыгралі асаблівую ролю ў гісторыі збаўлення, імёны даваў сам Бог: Адам — чалавек зямлі. Ева — маці ўсіх жывых, Абрагам — айцец усіх народаў.
Імя Езус, па словах пастыра архідыяцэзіі, таксама не было выпадковым, а было дадзена Богам. Яно было прадказана Марыі арханёлам Габрыэлем падчас Звеставання, а таксама ў сне святому Юзафу, якому Божы пасланец патлумачыў, што Езус збавіць чалавецтва з палону граху.
Такім чынам, Езус — значыць Збаўца, гэтае імя «кажа нам пра мэту Яго існавання, а менавіта збаўленне чалавецтва».
Вось чаму, падкрэсліў арцыбіскуп, мы павінны з вялікай пашанай ставіцца да Імя Езуса: бо яно святое і нагадвае нам пра тую ласку, якую мы атрымалі, — збаўленне.
Іерарх дадаў, што набажэнства да Імя Езуса ўкаранена ў Святым Пісанні, асабліва ў Дзеях Апосталаў: з апостальскіх часоў Касцёл вызнаваў праўду аб тым, што на Імя Езус згінаецца кожнае калена істотаў нябесных, зямных і падземных.
Культ Імя Езуса зрабіў агульным для ўсяго Касцёла папа Інацэнтый ХІІІ у 1727 г.
Месяц студзень прысвечаны ў Касцёле набажэнству да святога Імя Езуса.
«Імя Езус — гэта імя радасці, надзеі і любові. Імя радасці, бо нагадвае нам аб тым, што Езус збавіў чалавецтва з палону граху і гэтым самым вярнуў чалавецтву страчаную радасць.
Імя надзеі, бо калі мы просім аб чымсьці нябеснага Айца ў Імя Езуса, то атрымаем, аб чым Ён сам кажа.
Імя любові, бо нагадвае нам аб бязмежнай любові Бога да чалавека, апагеем якой стала крыжовая смерць Хрыста», — сказаў арцыбіскуп Тадэвуш Кандрусевіч.
Падчас святой Імшы іерарх прыняў віншаванні ў дзень нараджэння.
