220 гадоў таму, у вігілійны вечар 24 снежня, на свет прыйшоў наш славуты суайчыннік Адам Міцкевіч.
Гэтую «круглую» дату адзначылі вернікі з мінскай парафіі св. Сымона і св. Алены, якія разам са сваім пробашчам кс. канонікам Уладзіславам Завальнюком сабраліся ў гэты дзень каля помніка нашаму славутаму земляку, усталяванага ў цэнтры Мінска.
Памяць вялікага паэта ўшанавалі малітвай з традыцыйным дзяленнем аплаткай, спевамі і чытаннем яго вершаў, якія прагучалі як у арыгінале, так і ў перакладзе на беларускую мову.
Дарэчы, гэта ўжо не першае памятнае мерапрыемства, прысвечанае Адаму Міцкевічу. У гэтым месяцы ў Чырвоным касцёле ў яго гонар праводзілася вялікая культурная імпрэза «Адамаў шлях пад вечным небам», у якой бралі ўдзел таксама землякі паэта.
