18 снежня ў Мінску прайшла аплаткавая сустрэча Мітрапаліта Мінска-Магілёўскага арцыбіскупа Тадэвуша Кандрусевіча са студэнтамі першага курса духоўных семінарый.
У сваёй прамове іерарх падкрэсліў значэнне святаў Божага Нараджэння як Богаўцелаўлення.
«Цуд Уцелаўлення Божага Сына адбыўся больш за дзве тысячы гадоў таму ў Бэтлееме, але дзякуючы служэнню святара ён адбываецца штодзённа, калі падчас цэлебрацыі Эўхарыстыі Езус нараджаецца на алтарах, каб быць хлебам жыцця», — сказаў іерарх.
«Слова „Бэтлеем“ азначае „дом хлеба“. Таму кожная святая Імша — гэта ажыццяўленне таямніцы Бэтлеема. Яна, аднак, не можа адбыцца без святара, бо толькі ён можа цэлебраваць Эўхарыстыю», — падкрэсліў арцыбіскуп.
Іерарх звярнуў увагу на тое, што семінарыйныя гады — гэта час фармацыі да святарства, каб потым стаць інструментамі ў Божых руках з мэтай ажыццяўлення цуду Бэтлеема ў наш час.
Арцыбіскуп пажадаў семінарыстам вытрымкі на шляху святарскай фармацыі і благаслаўлення Божага Немаўляці як на святы Божага Нараджэння, так на і надыходзячы год, каб гэты час стаў часам узрастання ў ведах і ў Божай ласцы з мэтай стаць у будучыні святарамі Новага Запавету, якія дзейнічаюць моцаю Хрыста Збаўцы.
