![](/3/images/news/2018/12/9024/2018-12-05-wuegh3u24i653.jpg)
У ІІ нядзелю Адвэнту ў Каталіцкім Касцёле ў Беларусі адзначаецца Дзень удзячнасці тым, хто дапамагае Касцёлу на Усходзе. Сёлета ён будзе святкавацца 9 снежня.
У гэты дзень вернікі Каталіцкага Касцёла ў Беларусі моляцца за ўсіх, хто дапамагае Касцёлу на Усходзе, — за дабрадзеяў, пры дапамозе якіх у нашай краіне узводзяцца і аднаўляюцца святыні і ажыццяўляюцца розныя душпастырскія праекты.
У Польшчы гэты дзень называецца Днём малітваў і матэрыяльнай дапамогі Касцёлу на Усходзе. Пад Усходам тут разумеюцца перадусім краіны былога Савецкага Саюза. Ініцыятарам правядзення гэтага дня з’яўляецца епіскапат Польшчы.
Яго галоўная мэта — звярнуць больш увагі на супольнасць Касцёла, што адраджаецца ў краінах Усходняй Еўропы, Расіі і Цэнтральнай Азіі, а таксама падтрымаць ініцыятывы на карысць евангелізацыі мясцовага насельніцтва, якое стала ахвярай пераследу веры і атэістычнай прапаганды ў савецкія часы.
Кіраўнік беларускага епіскапату арцыбіскуп Тадэвуш Кандрусевіч у сувязі з гэтым адзначае:
«Такая акцыя салідарнасці польскіх католікаў з католікамі былога Савецкага Саюза праводзіцца ўжо ў дзевятнаццаты раз. Ахвяраванні, якія збіраюцца ў касцёлах, прызначаюцца на літургічную, катэхетычную, фармацыйную і рамонтна-будаўнічую дапамогу».
«Католікі Беларусі ўдзячныя сваім польскім адзінаверцам, якія дапамагаюць у адраджэнні Касцёла ў нашай краіне пасля трох пакаленняў ганенняў. Заахвочваю вернікаў 9 снежня памаліцца за нашых ахвярадаўцаў.
Няхай добры Бог ім благаславіць і аддзячыць за іх дабрыню і ахвярнасць», — дадае беларускі іерарх.