22 кастрычніка ў Каталіцкім Касцёле ўспаміналі святога Яна Паўла ІІ. Смаргонская парафія, якая носіць тытул гэтага святога, з'яўляецца першай у Беларусі, заснаванай пад такім тытулам. Напярэдадні тут адсвяткавалі парафіяльнае свята.
Галоўным цэлебрантам на святой Імшы быў а. Анатоль Ярошка OFM Cap, пробашч маладзечанскай парафіі Св. Айца Піо. Таксама на супольнай малітве прысутнічалі святары са Смаргонскага дэканату і яго ваколіц.
Пасля святой Імшы свята працягнулася ў зале Цэнтра культуры. Тут гасцей чакаў канцэрт музычных гуртоў AVE і Laudans.
Адметнай рысай другой паловы святкавання стаў удзел прысутных у бяспройгрышнай латарэі. Сродкі ад рэалізацыі квіткоў латарэі пайшлі на будову новага касцёла.
