У Гродне пачаўся трэці этап рэстаўрацыі лямуса — унікальнага помніка беларускага драўлянага дойлідства, які ўваходзіць у комплекс былога кляштара брыгітак.
Лямус (з ням.: Lehmhaus — гліняны дом) — гаспадарчая пабудова для захавання харчовых прадуктаў, адзення, збожжа, прыладаў працы, каштоўнай маёмасці, a таксама для жылля ўлетку.
Гродзенскі лямус быў пабудаваны ў першай палове XVII ст. і з’яўляецца адной з самых старажытных драўляных пабудоваў на тэрыторыі Беларусі.
Даследчыкі мяркуюць, што напачатку ў ім размяшчаліся келлі, у якіх жылі манашкі. Паколькі дрэва — матэрыял нетрывалы, унікальная пабудова патрабуе асаблівага догляду і клопату пра яе.
Рэстаўрацыя лямуса брыгіцкага кляштара праходзіць з 2016 г. За гэты час спецыялістам удалося правесці вялікі аб’ём працаў па захаванні ўнікальнага драўлянага будынка. Помнік аднаўляецца дзякуючы датацыям Міністэрства культуры і нацыянальнай спадчыны Польшчы.
На цяперашні момант спецыялісты ўжо адрамантавалі апоры даху, умацаваўшы кроквы дошкамі, прапітаўшы ад шкоднікаў і абараніўшы ад цвілі. Да зімы яны накрыюць вальмавы дах гонтам, а таксама выканаюць шэраг сталярных працаў.
