Зварот да Прэзідэнта і Савета Міністраў з просьбай «зрабіць Дзяды непрацоўным днём» і «даць магчымасць ушанаваць продкаў» апублікаваны на платформе Zvarot.by.
Аўтары петыцыі збіраюць подпісы, каб вярнуць выхадны дзень 2 лістапада або зрабіць непрацоўным 1 лістапада. Трэба нагадаць, што 2 лістапада быў непрацоўным днём з пачатку незалежнай Беларусі да 1996 г.
У Каталіцкім Касцёле на 2 лістапада прыпадае ўспамін усіх памерлых вернікаў, а беларусы святкуюць у гэты дзень “Дзяды”.
Аўтар петыцыі – Алёна Германовіч з гомельскай парафіі Нараджэння Маці Божай. У каментарыі беларускай рэдакцыі Vatican News яна адзначыла, што летась пад аналагічнай петыцыяй было сабрана каля 2 тыс. подпісаў.
«У адказе, які мы атрымалі ад Апарата Упаўнаважанага па справах рэлігій і нацыянальнасцей, гаворыцца, што права на свабоду веравызнання, замацаванае ў Канстытуцыі, не дае вернікам ніякіх пераваг перад грамадзянамі, якія прытрымліваюцца атэістычных перакананняў – у адваротным выпадку гэта парушыць прынцып раўнапраўя грамадзян.
Менавіта таму ў апараце Упаўнаважанага палічылі, што дапаўняць святочныя дні, якія адзначаюцца ў Беларусі як рэлігійныя, “немэтазгодна”».
Аўтар петыцыі нагадала, што аб успаміне усіх памерлых вернікаў, які адзначаецца 2 лістапада, у адказе нічога не гаворыцца. Але ў петыцыі падымалася якраз пытанне працоўнага дня на «Дзяды» – дзень, важны не толькі католікам, але і грамадскасці ў цэлым.
Беларусам прапануюць падпісаць петыцыю і падтрымаць кампанію незалежна ад прыналежнасці да канфесіі. Калектыўны зварот зноў будзе накіраваны ў Савет Міністраў і Адміністрацыю Прэзідэнта.
У звароце таксама адзначана, што праваслаўныя вернікі маюць свой дзень памяці продкаў – Радаўніцу, якая афіцыйна з’яўляецца выхадным.
«Кіраўніцтва дзяржавы перад Радаўніцай пераносіць працоўныя дні, каб праваслаўным грамадзянам Беларусі было зручна выканаць свае абавязкі ў адносінах да продкаў.
Католікі, як і многія беларусы, якія адзначаюць “Дзяды” паводле старажытнай традыцыі, пазбаўлены такой магчымасці.
З мэтай дасягнення сацыяльнай справядлівасці ў грамадстве, захавання добразычлівых адносін да прадстаўнікоў розных канфесій і рэалізацыі канстытуцыйнага права на свабоду сумлення патрабуем зрабіць 1 і 2 лістапада непрацоўнымі днямі ў Беларусі», – адзначае складальніца петыцыі.
