Пошук
21.08.2018 19:50   Тэкст: Надзея Кім / krynica.info / Catholic.by

 

Да 19 жніўня выйшаў першы ў Беларусі біблійны мабільны дадатак для дзяцей па-беларуску.

Праграма ад кампаній YouVersion i OneHope, якую ўжо спампавалі 10 мільёнаў чалавек па ўсім свеце, цяпер дасяжная і беларусам.

Што і як

Праграма зроблена як падарожжа з 41 анімаванай інтэрактыўнай біблійнай гісторыяй са Старога і Новага Запаветаў. Дзеці прачытаюць пра такіх герояў веры, як Абрагам, Даніэль, Ілля, і, натуральна, Добрую вестку Езуса Хрыста. Персанажы рухаюцца, размаўляюць і ажыўляюць Біблію для маленькіх чытачоў: апостал Павел сапраўды трапляе ў шторм, Ной будуе каўчэг, а Пан Езус падымае паралізаванага.

Яркія колеры і выдатная графіка прыцягваюць увагу, тры ці чатыры пытанні ў кожным аповедзе дапамогуць заппамятаць ісціны Пісання, а гульня ў канцы — замацаваць прачытанае.

Дзіцячую Біблію можна не толькі чытаць, але і слухаць: усе гісторыі на беларускую мову агучаны Паўлам Харланчуком. Пераклад і запіс зрабіла кампанія Кінаконг.

Водгукі бацькоў

«Нам спадабалася форма гульні, схаваныя цікавосткі, што ствараюць атмасферу адкрыцця, прыемны голас агучкі, пытанні на замацаванне, — кажа Надзея Гарэцкая, маці траіх дзяцей. — А яшчэ магчымасць прайсці праз усю Біблію, як праз падарожжа».

«Біблія для дзяцей — вельмі цудоўная праграма. На жаль, раней даводзілася слухаць па-украінску. Дзеці былі ў захапленьні, што нарэшце могуць слухаць і чытаць па-беларуску. Прыемна, што агучана добра знаёмым ім голасам Паўла Харланчука — „беларускага Пэтсана“. Вельмі годны падарунак для нашых дзетак з нагоды 500–годдзя беларускай Бібліі», — дзеліцца Вераніка Шкабара, маці траіх дзяцей.

Узрост і дзе знайсці

Дадатак разлічаны на дзяцей 6–8 гадоў, але будзе цікавы і меншым.

Спампаваць праграму можна праз Play Store ці па спасылцы.

Абноўлена 21.08.2018 19:54
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання
. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа