Больш за дзве з паловай тысячы пешых пілігрымаў з усіх дыяцэзій Беларусі прыбылі 1 ліпеня ў Будслаў на святкаванне 20-годдзя каранацыі цудадзейнага абраза Маці Божай.
Статыстыка пілігрымак
Рэкардсменамі па колькасці пройдзеных кіламетраў сёлета сталі пілігрымы з Брэста, якія ў складзе пілігрымкі Брэст – Баранавічы – Будслаў за 16 дзён пераадолелі 537 (!) кіламетраў.
Гэта была адзіная пілігрымка з Пінскай дыяцэзіі. Яна ж стала і самай масавай, сабраўшы ў дарогу 271 верніка.
250 чалавек прыйшло ў Будслаў з Маладзечна, 221 — з Нарачы, 220 — з Глыбокага.
Чатыры пілігрымкі на шляху ў Будслаў прайшлі больш за 200 км: Брэст – Баранавічы – Будслаў (537 км), Віцебск – Будслаў (290 км), Ліда – Будслаў (250 км) і Росіца – Будслаў (218 км).
270 км праехала роварная пілігрымка з Баранавіч, 250 км — пілігрымы на роварах з Віцебска.
Асобнай пілігрымкай у Будслаў прыбылі вернікі на чале з ксяндзамі салезіянамі (Салезіянская пілігрымка Смаргонь – Будслаў), а таксама сямейная пілігрымка Equipes Notre-Dame Пузыры – Будслаў, пакутная пілігрымка пакаяння Мінск – Будслаў, пілігрымка цвярозасці Бягомль – Будслаў і асобная пілігрымка дзяўчат-скаўтак «Нацыянальная вандроўка правадніц».
Будслаў і дождж
Дождж, які ідзе ў Будславе амаль увесь дзень, прымусіў перанесці запланаваную для пілігрымаў Імшу з вуліцы ў сцены санктуарыя.
Святую Імшу для пілігрымаў узначаліў дапаможны біскуп Гродзенскай дыяцэзіі Юзаф Станеўскі, які ў Канферэнцыі Каталіцкіх Біскупаў у Беларусі адказвае за моладзь. Вітаючы пілігрымаў, іерарх прыгадаў прыпавесць, якая вучыць, што знайсці мора можна ідучы па цячэнні рэк.
«З усіх напрамкаў Беларусі, а таксама і з-за мяжы, нібы рачныя патокі, у Будслаў гадамі ішлі дзясяткі тысяч пілігрымаў, прапітваючы сваёй малітвай асяроддзе і запрашаючы ўсіх да Каралевы сем’яў — да абраза Маці Божай Будслаўскай.
«Мяркую, што дзякуючы вам — пілігрымам — шмат людзей абудзілася ад сну нявер’я», — адзначыў біскуп.
«Словы падзякі пад абразом Маці Божай Будслаўскай скіроўваем да ўсіх, з кім ствараем адну вялікую сям’ю, імя якой Беларусь. Божа, благаславі нашу краіну!» — дадаў іерарх.
У сваёй гаміліі біскуп Станеўскі засяродзіўся на тэме распазнавання сябе і свайго паклікання.
«Стагоддзямі вернікі пры сустрэчы з Марыяй у Будслаўскім санктуарыі паўтараюць за св. Альжбетай поўныя даверу і любові словы: „Благаслаўлёная Ты, Панна Марыя, якая паверыла, што споўняцца словы, сказаныя Табе ад Пана“.
Альжбета распазнае прыходзячага Пана ў сваёй сваячцы — гэта не проста. А як цяжка бывае нам распазнаць Бога, якога добра ведаем? Як лёгка не заўважыць Бога ў тым, што нам блізка!»
«Вера без малітвы не пакідае следу»
Біскуп падкрэсліў, што багацце духоўнага жыцця чалавека залежыць ад паглыблення яго веры.
«Чалавек, які не распазнае Бога, які прыходзіць да яго ў звычайнай штодзённасці, губляе магчымасць спазнання сябе самога», — дадаў іерарх.
Біскуп Юзаф Станеўскі нагадаў, што быць сабой і распазнаваць сябе дазваляе малітва — асабістая, шчырая і дабравольная: «Не можа чалавек лічыць сябе веруючым, калі не моліцца. Яго вера застаецца тэарэтычнай, яе не відаць, яна не пакідае слядоў».
«Хрыстус стукае ў нашы дзверы. Ці мы адчынім іх?»
Як дадаў іерарх, у сваім жыцці чалавек не заўсёды ўсведамляе прысутнасць Езуса, але гэтая прысутнасць «з’яўляецца неўміручай крыніцай чалавечай сілы».
«Хрыстус стаіць побач з намі. „Вось стаю каля дзвярэй і стукаю. Калі хто пачуе Мой голас і адчыніць дзверы, — кажа Езус, — увайду“. Ці адкрылі мы ўжо сэрцы для Хрыста?» — звярнуўся біскуп да моладзі.
Іерарх нагадаў, што 2018 год у Касцёле ў Беларусі праходзіць пад дэвізам «Моладзь — надзея Касцёла і грамадства».
«Папа Францішак на сустрэчы моладзі ў Кракаве сказаў: „Вы маеце патрэбу ў тым, каб адчуць, што хтосьці сапраўды верыць у вас“. Дык ведайце, што Пантыфік верыць у вас, што Касцёл верыць у вас! Даверцеся Касцёлу!
Дарагія сябры, паўтараю за Папам Рымскім: Касцёл у Беларусі верыць у вас, давярае і ўскладае надзею на вас! Бо вы — «пакліканыя з Марыяй да жыцця ў ласцы Божай», — заключыў іерарх.
Біскуп заклікаў моладзь не баяцца будаваць свой дом «у Касцёле і з Касцёлам», а таксама дзейнічаць.
«Недастаткова сядзець за камп’ютарам ці ляжаць на канапе перад тэлевізарам і паўтараць: „Я не грашу“, „Я веру ў Бога“. Трэба ўстаць з канапы, каб быць побач адно з адным і дзяліцца са светам Хрыстом у сабе», — дадаў біскуп.
Аб адвазе і запрашэнні Хрыста ў штодзённае жыццё біскуп заклікаў прасіць у Маці Хрыста.
«Любая моладзь, вы — будучыня Касцёла і грамадства. Дык будуйце ж яе разам з Хрыстом, нашым Збаўцам, і Марыяй, Каралевай Беларусі!» — заключыў іерарх.
Завяршыў св. Імшу сумесны спеў, напісаны адмыслова да 20-годдзя каранацыі папскімі каронамі абраза Маці Божай Будслаўскай, які падрыхтаваў гурт Ubi Caritas з Івянца.
* * *
У Імшы для пілігрымаў, якую ўпрыгожваў спевамі гурт Ave Вышэйшай духоўнай семінарыі ў Гродне, прымалі ўдзел шматлікія святары, кансэкраваныя асобы, а таксама біскупы — прадстаўнікі кожнай дыяцэзіі.
